Asturianizar versus galleguizar
|
2 Febreru, 2010 por Damián Barreiro
- Inicie sesión o rexístrese pa espublizar comentarios
Sobre les declaraciones de Ferrín, Consuelo Vega dixo que nun tien llexitimidá pa falar d’oficialidá, mientres qu’Ana Cano señaló que’l problema vien pola falta d’esi marcu llegal.
En declaraciones recoyíes güei pol diariu uvieín “La Nueva España”, la Direutora Xeneral de política Llingüística refirióse a les declaraciones de Xosé Luis Méndez Ferrín, onde’l recién estrenáu presidente de la Real Academia Galega pidía la oficialidá del asturianu en toa Asturies, amás del gallegu nel Navia-Eo, y acusaba a l’Academia de la Llingua d’asturianizar la fala del occidente.
Pa Consuelo Vega les pallabres de Ferrín sobre la oficialidá son mui respetables, “como les de cualquier ciudadanu d’Asturies”, pero nun tienen llexitimidá “yá que’l territoriu asturianu namás compete a los asturianos”.
La encargada de la política llingüística dixo que’l Principáu nun intenta “asturianizar el gallego-asturianu”, yá que lu reconoz como dalgo específicu, “un reconocimientu xurídicu que se traduz al ámbitu alministrativu, educativu y cultural”.
Tamién la presidenta de l’Academia, Ana Cano, refirióse nel periódicu uvieín a l’ufrimientu del presidente de la RAG, pa consensuar una norma pal eonaviegu ente les dos instituciones. Cano esclarió que l’Academia “enxamás nun va renunciar a l’asturianidá de los tolos conceyos d’Asturies y ta a la escontra de que se quiera galleguizar l'Occidente”.
Sicasí, p’Ana Cano la cuestión nun ye lo que digan dende Galicia, yá que’l principal problema ye la falta d’oficialidá, “esti marcu llegal acabaría con estes inxerencies”.
Efrén d'Andrés
Comentarios
Esti ataque a les competencies llingüístiques asturianes dende la comunidá vecina ye una preba más de la necesidá d'afitar llegalmente la oficialidá. Mientres nun se faiga realidá esi drechu democráticu, taremos albentestate de les agresiones d'otros nes cuestiones de nueso.
De xuru que nun va gustar lo que vo dicir, pero'l nuevu presidente de la RAG tien tola razón del mundu n'esixir la oficialidá del gallegu na zona Eo-Navia: ellí, vamos ver si mos enteramos d'una vez, fálase gallegu, y si vos presta más, una variante del gallegu, pero gallegu, non asturianu. Y viendo que dende equí, Asturies, nun se fai un res pol asturianu, nin pol gallegu nesa zona, pues bienveníes seyan les pallabres del señor Ferrín, que diz bien claro que l'asturianu ha ser oficial. ¿Qué faen los nuestros políticos pola llingua? ¿alcordáisvos de lo que dixo'l presidente del RIDEA fai unos años cuando la polémica de les ponencies n'asturiano al celebrar el 70 aniversariu de la so esistencia? Sinceramente, menos alarmase por esa "invasión galleguizante" (por favor!!!) y mandar a tomar pel c*** a la gandaya que mos gobierna y que nun fai nada pola cultura y llingua (llingües) d'Asturies.