Carreño refuga la moción d'UNA que pidía la reforma del Estatutu

El plenu de Carreño ta acabantes de refugar la moción d’UNA na que se pidía a los grupos representaos na Xunta Xeneral, la igua del Estatutu d'autonomía.

La moción quería tresmitir a los tres grupos parlamentarios la “necesidá urxente” de la reforma estatutaria “p'afayar la realidá institucional asturiana a la de l'actual situación del Estáu y dar respuesta a cuestiones inaplazables como asegurar la capacidá financiera d'Asturies y de los sos conceyos, tornar una situación de desigualdá y de falta de recursos d’Asturies y los sos conceyos, iguar una Carta de Drechos y Obligaciones y proclamar la oficialidá de la llingua asturiana”.

La moción llevóse a votación nel plenu, nel que tuvo’l sofitu, amás de la propia UNA, de los conceyales d’Unión Independiente de Carreño (UICA) ya Izquierda Unida. Sicasí, la propuesta nun contó con mayoría al votar en contra de la mesma PSOE y PP y abstenese’l conceyal de PAS-URAS.

El conceyal d’UNA en Carreño, Xuan Rodríguez recordó que la propuesta d’UNA nun ye un “caprichu”, nin una “defensa a lo xole” d’un modelu xurídicu políticu que nun ye’l que más nos gusta, sinón que “se plantega porque na situación actual colos problemes de financiación nos conceyos, de blindaxe d’inversiones d’otros territorios, y del peligru que cuerre’l nuesu patrimoniu cultural y especialmente la llingua, Asturies nun pue dexar pa prau la posibilidá d’iguar esos problemes a traviés d’una reforma estatutaria”.

El conceyal d’UNA calificó de “esperable anque decepcionante” la postura de PSOE y PP, que siguen les consignes marcaes dende Madrid y Uviéu, y que si punxeren en marcha una reforma nun sedría pa dar respuesta a estes necesidaes, sinón pa fundir más a Asturies.

Per otru llau espresa la so indignación con PAS-URAS que nun sofitó la moción “demostrando una vegada la política nes antípodes del asturianismu que tien esta coalición en Carreño”. Xuan Rodríguez recordó que’l conceyal de PAS-URAS, Joaquín Rodríguez, yá foi conceyal en Carreño na etapa preconstitucional y “siempre actúa con indiferencia o mesmamente belixerancia énte cualquier iniciativa d’UNA que pida la oficialidá del asturianu o la normalización de la llingua asturiana”.

UNA quier agradecer a UICA y IU el so sofitu, que según señalen nel segundu casu tien más méritu “al nun concasar cola política d’esta coalición nel conxuntu d’Asturies, na que plantega como una victoria la so incapacidá pa forzar al PSOE a proponer l'Estatutu qu’Asturies precisa”.