Gabilondo refuga defender el castellán combatiendo otres llingües

El ministru d'Educación dixo qu'un idioma nun se cuida "combatiendo" otres llingües cooficiales. "Y menos nel ámbitu autonómicu, onde la so conocencia ye indispensable", añadió.

Ángel Gabilondo amparóse na Constitución pa reivindicar la "incuestionable" defensa del castellán, pero llamó "al consensu y a nun dramatizar" sobre la cuestión llingüística.
 
Asina se pronunció'l titular de la cartera educativa, nuna entrevista cola Cadena SER, recoyida por Europa Press, tres pregunta-y un oyente sobre les bases del decretu del plurillingüismu na enseñanza promovíes pola Xunta de Galicia y el so posible encaxe nel pautu pola educación propuestu pol so departamentu.
  
Dende'l "total respetu" a les competencies de les autonomíes, el ministru d'Educación apostó por facer "convivencia de llingües" y garantizar, en tou casu, "la conocencia del castellán y del gallegu", igual que l'usu "perfeutu y apropiáu" d'ambos.
  
Nesti contestu, avanzó qu'espera, nel marcu del pautu de la educación, realizar "evaluaciones de diagnósticu" pa ver cómo se conocen les llingües nel Estáu. "Igual llevamos una sorpresa, pero los datos que tenemos güei indiquen que se conoz bien el castellán y otres llingües nes comunidaes que les tienen", señaló.
  
Poro, mostróse convencíu de que "se fixo bien" y apostó por "nun dramatizar" cola cuestión llingüística nin "introducir nuevos problemes". "Con too, aseguró esperar que nel pautu educativu tome "conciencia" de la cuestión dao que, almitió, "nun ye un problema prioritariu, pero sí importante".
 
"Arma arroxadiza"
    
En tou casu, el ministru d'Educación almitió "nun tener mui claru" que se puean dictaminar midíes sobre les hores nes que "estrictamente" debe impartise cada idioma nes comunidaes con idiomes cooficiales, como tenta de facer el nuevu decretu de la Xunta y mostróse partidiariu de plantegamientos "específicos".
  
"En dalgunos casos, en Cataluña, va haber que dar más hores de castellán y n'otros, de catalán", exemplificó Gabilondo y insistió en que "lo que nun pue asoceder ye qu'un estudiante nun conoza les dos".
  
En cuanto a les declaraciones realizaes pol cabezaleru del PP, Mariano Rajoy, avisó de que "lo primero qu'hai que facer" pa defender el castellán ye "falalu bien, y cuidalu y nun usalu como arma arroxadiza". "Nun se defende un idioma sólo faciendo discursos sobre él; hai qu'amalu y cuidalu", sorrayó y reclamó nun emplegalu p'abrir un alderique sobre la estructura d'España y el modelu de les autonomíes.