Méndez Ferrín pide la oficialidá del asturianu y del gallegu

|

El nuevu presidente de la RAG, l'escritor Xosé Luis Méndez Ferrín, pidió la oficialidá de l’asturianu, menos nel Navia-Eo, onde esixó la del gallegu.

Ferrín, que foi elixíu’l pasáu día 23 de xineru, en sustitución de Xosé Ramón Barreiro, reivindicó la galleguidá llingüística del Navia-Eo, onde “enxamás nun falen asturianu”, aceptando la posibilidá de llegar a un consensu normativu cola Academia de la Llingua Asturiana pal occidente d’Asturies, siempre y cuando ésta "dexe d’asturianizar".  

Según Ferrín “nun se pue tratar d’asturianizar poniendo “y”, eso ye inmaduru”, en referencia a pallabres como trabayar, que n’eonaviegu escríbense igual que n’asturianu, con “y”, mientres qu’en gallegu ye “traballar”.

"L’asturianu ha ser oficial n’Asturies y el gallegu tamién nel occidente d’Asturies", señaló Ferrín. "A min dame muncha rabia que l’asturlleonés seya cooficial en Mirando do Douro y reconocíu pola República Portuguesa, y l’asturianu nun lu seya n’Asturies", comentó, si bien añadió que "l’occidente d’Asturies ye otra cosa, y tien que tener un tratamientu especial, y nós apoyamos les normes del gallegu d’Asturies del Navia-Eo".

Pa Ferrín, "l’asturianu forma parte d’una unidá llingüística venerable, antigua, que sobrevive hasta Portugal y Lleón, y esti  tien que ser oficializáu dafechu, nun vergonzante ya insuficientemente como ta anguaño; l’asturianu tien que ser llingua oficial y el gallegu tamién tien que ser llingua oficial d’Asturies", declaró'l presidente de la Real Academia Galega.

Ferrín reconoció que’l Navia-Eo nun compete a Galicia, pero señaló qu’él ta en contautu con movimientos culturales y persones del occidente. Dende’l so puntu de vista, "ye curiosu que n’Asturies occidental haya una gran cantidá d’escritores en gallegu, unos más dialeutales y otros más normativos, pero hai un cultivu del gallegu perimportante, munchísimo más que n’El Bierzu", afirmó.

Comentarios

Solu esi camin  nos pondra nel llugar que debe tar Asturies ,dientro de la so pluralida...Toos xuntos farase'l camin mas facil!!

Contador Estadistiques