Palestina namás aceptará Xerusalén como capital del futuru estáu

El presidente palestín, Mahmud Abbas, alvirtió que nun s'aceptará otra alterntiva que nun seya Xerusalén como la capital del so futuru estáu. 

Esplicó que, anque cree que la parte oriental y occidental nun deben dividise na práctica, ye importante dexar claro qué parte de la capital pertenez a los palestinos y qué parte pertenez a Israel.
  
Amás, indicó que sólo podría reconocer a Israel como Estáu nel marcu d'un acuerdu de paz concluyente que lleve al establecimientu d'un Estáu palestín. El dirixente árabe aseguró que nun podrá volver entamar les negociaciones de paz con Israel nun siendo que cese la construcción en Xerusalén Este y Cixordania.
  
"Si Israel diz nel conceyu que nun aceptará les fronteres de 1967, y que nun ta preparáu p'aldericar la situación de Xerusalén y de los refuxaos, ¿de qué va falar?", entrugóse nuna entrevista con una televisión rusa. "Si entramos en negociaciones con ellos y prosigue la construcción en Xersualén Este, Israel dirá que Xerusalén ye suya, asina que, ¿por qué acordaría negociar mientres continúa la construcción en Xerusalén Este?", indicó.
  
Israel yá refugó dos iniciatives formulaes polos palestinos, Exipto y Xordania, pa rellanzar les conversacioens, según Abbas. Nestes propuestes, Israel tendría qu'acordar la conxelación de la construcción en tolos asentamientos y reconocer les resoluciones internacionales.
  
El dirixente palestín tamién indicó qu'EE.UU pidió a Israel qu'avere postures colos palestinos, incluyida la tresferencia de territorios adicionales en Cixordania que quedaríen baxo control palestín, la detención de les incursiocnes militares israelís, la lliberación de prisioneros y la entada de materiales de construcción a la Franxa de Gaza, recueye'l diariu israelí 'Haaretz'. D'acordies con Abbas, Israel afirmó que consideraría estos xestos pero tovía nun respondió.