Esti sábadu, a les 20.00 hores, el Teatru Xovellanos acueye la segunda edición de “Xixón fala n’asturianu”, una gala que quier rindir homenaxe a los falantes y artistes que usen l’asturianu.

L'eventu foi presentáu ayeri en rueda prensa pol Conceyal de Cultura Tradicional y Llingua Asturiana, Jesús Montes Estrada y Roberto Colunga,  asesor de cultural tradicional y llingua na Xunta de Gobiernu del Conceyu de Xixón, quien definió la gala como “un reconocimientu a la xente que trabaya y vive n’asturianu, daqué complicáu anguaño”.
 
Na presentación tamién participaron l’actor Carlos Alba, que col so personaxe “El Pola” pondrá n’escena “Caleya Urbana”, un espectáculu que calificó como un monólogu rock y nel que cuntará cola guitarra acústica de Rafa Kas pa facer versiones de grupos como Extremoduro, Beleño o Los Berrones.
 
Tamién taba na rueda de prensa Toño Caamaño, que vuelve presentar la gala, como fixo l’añu pasáu, y va facer una serie de monólogos nomaos “Sexu sentíu”, obra d’Adolfo Camilo Díaz. Caamaño dixo que yeren d’agradecer iniciatives como esta, “d’apoyu a los artístes qu’usen l’asturianu”.

Amás d’ellos, van participar en “Xixón fala n’asturianu”, Dixebra, el cantaor Ismael Tomás Montes, el cantautor vaqueiru Rafa Lorenzo, y el tríu formáu por Gabino Antuña, Manolo Peñayos y Chus Pedro. La entrada ye de baldre previa recoyida d’invitación na mesma taquiella del Teatru Xovellanos.
 
La gala entamará a les 20.00 hores y tien una duración prevista d'unes dos hores en total. La entrada ye gratis, pero hai que recoyer la invitación na propia taquilla del Teatru Xovellanos o na mesma Oficina de la Llingua.