Berlusconi: "menos inmigrantes, menos criminales"

El primer ministru d'Italia, Silvio Berlusconi, afitó que con menos inmigrantes n'Italia habría menos criminales, según declaró demientres el llanzamientu d'un plan antimafia aprobáu esti xueves pol Gobiernu.

"Una disminución de los estracomunitarios n'Italia significa menos fuerces que van engrosar les files de les organizaciones criminales", aseguró'l premier tres defender la llucha del so Gobiernu contra la inmigración clandestina y na que los resultaos tán siendo "mui positivos".

Berlusconi fixo estes declaraciones en Reggio Calabria, la ciudá del sur d'Italia qu'acoyó un Conseyu de Ministros especialmente dedicáu a la batalles contra la mafia. Reggio Calabria ye la capital de la Calabria, una de les rexones del sur d'Italia más sometíes al poder de la mafia, concretamente, a la 'Ndrangueta'.
  
De fechu, el Gobiernu decidió xuntar ellí a los sos ministros en respuesta a dalgunos acontecimientos especialmente preocupantes rexistraos nes últimes selmanes, tales como les amenaces a los maxistraos per parte de la 'Ndrangheta y los altercaos de Rosarno, la población de la qu'espulsaron hai pocu tiempu a centenares d'inmigrantes que trabayaben en negro na collecha de la fruta.
  
Según los investigadores, l'asociación mafiosa orixinaria d'estes tierres taría detrás d'esti socesu, dau'l potente control qu'exerce sobre'l territoriu.
  
Sicasí, en llugar de denunciar la degradante situación en que los inmigrantes víense obligaos a vivir, Berlusconi anovó l'empeñu del so Gobiernu en plantar cara a la inmigración clandestina. Tovía asina, anunció que s'intenficcarán los controles nel sur d'Italia, sobre too nos sectores de l'agricultura y de la construcción, pa combatir la economía somorguiada.
  
La reaición del principal partíu de la oposición, el Partíu Democráta (PD), nun tardó en llegar. Una de les sos parlamentaries, Livia Turco, calificó les declaraciones de Berlusconi de "vergoñoses" porque con elles "afálase al racismu" y "aliméntase un clima d'intolerancia, con unes consecuencies imprevisibles".
  
A primeros de xineru, los fechos de Rosarno valieron pa demostrar la manera en que los propietarios de tierres del sur d'Italia esploten a los inmigrantes nel sector de l'agricultura, un problema que yá denunciaren abondes organizaciones, pero del que la política tovía nun s'ocupó.
  
A ello añádese la posibilidá de que fuere la mafia la que provocare la espulsión de los inmigrantes col oxetivu de reafirmar el so poder sobre'l territoriu, nun momentu nel que'l sector de la fruta atraviesa una grave crisis.
  
De fechu dalgunos observadores señalen que los agricultores yá nun queríen dar más trabayu a los inmigrantes a la espera de recibir les ayudes europees, que nun se basen na cantidá de fruta recoyida sinón nel númberu d'árboles plantaos.