La conseyera de Bienestar Social y Vivienda considera "una censura política" el cese y un "esperpentu" qu'a Pepe El Ferreiro nun se-y permita la entrada al centru. Del mesmu mou, UNA quier una disculpa pública de Mercedes Álvarez.

"Refugamos esti cese tanto na forma como nel fondu", declaró la responsable autonómica, pa la que "la trayectoria de Pepe ta fuera de toa duda". La conseyera consideró "intolerable'l tratamientu que se-y ta dando a una persona que foi l'artífice d'ún de los meyores museos etnográficos d'España, y qu'algamó promover el desarrollu del occidente asturianu".  
 
A xuiciu de Martín, la "censura política" demuéstrenla "les declaraciones contradictories que tamos lleyendo estos díes: mientres la Conseyería de Cultura diz que Pepe foi un llastre pal muséu, el director elixíu destaca que se trata d'ún de los meyores museos etnográficos de tol país".
 
El remate d'esta operación inxustificable ye, según la conseyera, "la noticia que güei lleemos: que-y prohíben la entrada al muséu. Ye evidente que lo qu'entamó siendo un despropósitu acabó siendo un esperpentu".
 
UNA en desalcuerdu cola destitución
 
El coordinador d’Unidá Nacionalista Asturiana, Miguel Anxel Díez, quixo amosar tamién, el total desalcuerdo cola destitución, calificándola de “ataque frontal a la cultura ya a la sociedad asturiana ya una amuesa de las políticas autoritarias ya vengativas del actual Gobiernu d’Asturias”.
 
Pa xuiciu de Díez, El Ferreiro “ḷḷevantou una institución que güei en día ía un iconu de la cultura asturiana. Del mesmu mou señaló que “ ía lamentable que la Conseyería de Cultura tea en manos de personas capaces de tomar estas decisiones actuando por vendetas políticas en vez de guiase polos intereses de los asturianos”. Añadió que “ía necesaria una fuercia política nel parlamentu asturianu que defienda ensin complexos la cultura ya los intereses d’Asturias pa evitar casos cumu esti”.

UNA esixó a la Conseyera de Cultura, Mercedes Álvarez, una disculpa publica pol "lamentable despidu" de Pepe El Ferreiro.