Ámbitu edita 'Colección d'identidaes' de Xuan Bello

La editorial Ámbitu anunció güei la salida a la venta pal próximu llunes, ún de febreru, del llibru nuevu de Xuan Bello, tituláu "Colección d'identidaes". El trabayu inclúi versiones n'asturianu de poemes de Carl Sandburg, Larkin, Tonino Guerra, Amos Oz o Anna Akmátova.

La editorial esplicó qu'esti volume axunta la obra escoyida por Xuan Bello d'un grupu de poetes de tol mundu que l'escritor traduz a la llingua asturiana como un exerciciu puramente personal, pero tamién col oxetivu de dar a conocer a los sos llectores les coordenaes poétiques onde él se mueve.
 
Xuan Bello ye ún de los escritores más destacaos de la lliteratura contemporánea en llingua asturiana. En 1982, con malapenes 16 años espublizó’l primer llibru de poemes, escritu n’asturianu occidental "Nel cuartu mariellu". La fama lliteraria llego-y gracies a la traducción al castellanu de "Hestoria Universal de Paniceiros", que recibió’l premiu Ramón Gómez de la Serna y convirtióse nun de los llibros más destacaos polos críticos españoles en 2003.