Les esportaciones haza Arxelia duplicáronse nun añu

La collaboración ente les empreses del país y Arxelia foi medrando nos últimos años de manera "importante", hasta'l puntu que de los seis millones d'euros d'esportación que se rexistraben hai un añu, pasóse a once y espérase algamar la cifra de 20 "en pocu tiempu".

Asina lo manifestó güei l'embaxador d'Arxelia n'España, Mohammed Haneche, nuna rueda prensa enmarcada nel Puntu d'Alcuentru Internacional 2010, que se ta celebrando nel Hotel de la Reconquista d'Uviéu, Organizáu por Asturex.
  
Haneche indicó que, anque evidentemente Arxelia ta afectada pola crisis internacional, el país caltuvo niveles de crecimientu superiores al 3% y prevése que los mesmos se caltengan o incrementen nos próximos cinco años. "Esi crecimientu supón que la cooperación con empreses españoles y asturianes pue ves incrementada", dixo.
  
Nesti sen manifestó qu'Arxelia acaba d'aprobar un programa de meyores con una inversión de 150.000 millones de dólares, lo qu'abre tovía más posibilidaes de participación d'empreses asturianes. "Tamos como'l que diz nel entamu d'un procesu qu'esperamos seya mui fructíferu", dixo l'embaxador d'Arxelia en Madrid.
  
Pela so parte, el director xerente d'Asturex, Alberto Robles, indicó que l'interés de les empreses, sobre too pymes, ye cada vez mayor y afirmó que nesti momentu yá hai seis empreses asentaes y trabayando nel país y otra trentena d'ellos con negociaciones. Les mesmes manifestó que son de sectores mui diversos, dende les inxenieríes a les enerxétiques.
  
Manifestó que dende'l 2007 realizáronse cuatro misiones comerciales con importante éxitu y esti añu realizaráse otra más, amás d'un alcuentru empresarial gracies a la collaboración cola embaxada.
 
Defensa de los viaxes institucionales
  
Robles defendió los viaxes institucionales como una de les principales ferramientes al algame de los empresarios. "Cualquiera d'eses ferramientes son válides y hasta impagables", dixo Robles, que recordó que tolos gobiernos, seyan del color que seyan, faen esos viaxes porque son fundamentales pa que les empreses llogren contactos qu'ensin la presencia del presidente d'una comunidá seríen casi imposibles de llograr.
  
Nesti sen tamién Mohammed Haneche defendió estos viaxes que "se faen en tolos países" y recordó que les pymes por sí soles nun tienen capacidá pa llegar a países internacionales, polo que se requier l'apoyu institucional o sociedaes como Asturex.