Los ecoloxistes denuncien la falta d'alderique sobre la incineradora

La Coordinadora Ecoloxista d’Asturies quier denunciar que la FSA ye l’únicu partíu qu’apuesta pola incineración, “fuxendo del alderique políticu y dando-y la potestá de decidir como xestionen los residuos a Coxersa”.

Dende la Coordinadora amuesen como nin Ayuntamientu de Xixón, onde va instalase la incineradora, nin Xunta Xeneral van falar sobre l'asitiamientu de la planta, "faciendo una fuxida del alderique propia d'un paríu mayoritariu que remana casi too".
 
Los ecoloxistes señalen que según el Ministeriu de Mediu Ambiente, el 80% del residuu urbanu pue reciclase. Pero n’Asturies, señalen, esi reciclaxe nun algama nin el 10%, “alloñándonos de los compromisos que tenemos”.
 
Esclarien que tolos estudios solventes, “y non el que fixo un profesor asturianu conocíu pro-incineradora”, resalten que la quema de residuos aumenta la incidencia del cáncer nes proximidaes, amás d’otres enfermedaes.
 
La Coordinadora señala que ye preocupante que siendo Asturies la comunidá colos peores valores del Estáu en dellos contaminantes y onde la incidencia de dellos tipos de cáncer ye superior a la media, “les autoridaes promuevan instalaciones contaminantes”.
 
Los ecoloxistes señalen que la xestión de residuos urbanos precisa una política de 3 R; reducir, reutilizar y reciclar, “enxamás quemar, porque ye peligrosu, caru y desfai recuros limitaos”.