Claros y escuros pa la llingua nes ondes

Les radios comunitaries, como ye’l casu de Radio Sele, van ver reconocíes per primer vez el so papel como serviciu al ciudadanu. Sicasí, la Llei del Audiovisual que reconoz esta faceta, tamién afita unes normes que ponen en peligru la so viabilidá económica.

Una radio comunitaria ye una emisora creada cola sida de favorecer a un grupu de persones. Diches estaciones de tresmisión nun tienen fines económicos, anque dalgunes emiten publicidá pa sofitar el so mantenimientu. Estes radios contemplen el drechu del ciudadanu a ser emisor d’información y non namás receptor. El casu más conocíu, ensin dulda, ye’l de Radio Sele, cadena que dende febreru de 1986 enllena’l dial de pallabres y músiques na llingua del país.
 
La Llei Xeneral de la Comunicación Audiovisual, que foi aprobada pola Comisión Constitucional del Congresu de los Diputaos el pasáu siete de xineru, colos votos de PSOE, CiU y Coalición Canaria, entamará en febreru’l so trámite final nel Senáu. El testu va reconocer el llabor d'emisores como Radio Sele, pero tamién llindará’l so presupuestu a 50.000 euros añales y prohibirá cualesquier forma de publicidá.
 
Los responsables d’estes emisores, unes 150 en tol Estáu, quieren que nes próximes selmanes haya cambios qu’afiten el so futuru.Yá cuenten col sofitu de CCOO, UXT y la Federación de Sindicatos de Periodistes, que se dirixirán a los senadores pa que s’incluyan les enmiendes que proponen.
 
Ente les reivindicaciones, esixen que nun haya barrera presupuestaria, yá qu’entienden que-y pon torgues al so desendolcu y nun se pue llindar el presupuestu d’una actividá privada. Tamién quieren que la llei garantice la llicencia pa les emisores comunitaries yá esistentes, dalgunes perasentaes nes sos sociedaes de recepción. Como ye’l casu de Radio Sele, con cai 25 años d’emisiones.
 
La fin de les radios pirates
 
La nueva llei contempla la creación de l’Axencia Estatal de Radiocomunicaciones, que va constituise enantes del próximu 1 de xunu, cola sida de controlar l’espaciu radiollétricu. Esti organismu va realizar en collaboración coles alministraciones autonómiques un mapa de les radios del Estáu, encargándose de pesllar aquelles que nun tengan llicencia. Pero nun entamará de cero.
 
El Ministeriu d’Industria yá tien nes sos manes un informe realizáu pola Asociación Española de Radiofusión Comercial en 2004, que los operadores comerciales entregaron al Gobiernu español pa finar colo que califiquen como “caos nes ondes”. Esto va suponer un puntu y final pa les radios pirates, aquelles qu’emiten ensin llicencia y con fines comerciales, unes 40 n’Asturies según dellos estudios.
 
Conceyu Abiertu; ¿Va afeutar la Llei del Audiovisual a Radio Sele?
Xuanxo Mariño; "Si tenemos que parar siguiremos per internet"