El PP apoya la continuidá de Pepe El Ferreiro

Miembros del Grupu Popular de la Xunta Xeneral y de Grandas de Salime, amosaron yá'l so sofitu pa que Pepe El Ferreiro contunúe na Direición del Museu Etnográficu de Grandas. Mientres, en Facebook convoquen una concentración d'apoyu. 

Los diputaos del Grupu Popular na Xunta Xeneral del Principáu, Alfoso Román, Emilio Pérez y Marcial González, asina como miembros del PP de Grandas de Salime, ufrieron güei l'apoyu del partíu a Pepe El Ferreiro.
 
Los populares lu consideren "una auténtica institución cultural del occidente d'Asturies". Entienden amás que'l muséu supunxo pa Grandas, y pa tola comarca del Navia-Eo, "un auténticu puxu cultural y de promoción económica".

Refuguen "la pifia que quieren cometer" la conseyera de Cultura del Principáu, Mercedes Álvarez, y l'alcalde de Grandas, y añaden que ye "inxusticable" el so cese como director del muséu. Al so xuiciu, la convocatoria pa mañana d'un conceyu del consorciu que xestiona'l muséu fízose "a traición, con 'alevosía y nocturnidá'".
 
Concentración al traviés de Facebook
 
Al traiés d'un eventu de Facebook tán concocando una concentración de sofitu a Pepe El Ferreiro coincidiendo col aconceyamientu del Consorciu pa la Xestión del Muséu, mañana a les 15.30 na Conseyería de Cultura, nel Edificiu Calatrava. Asina, los manifestantes quieren amosar la so refuga y ascu "a la casta dominante".
 
Mientres, el grupu de sofitu a Pepe El Ferreiro na rede social, abiertu ayeri a media tarde, cuanta en menos de 24 hores con casi 900 persones.