Los Berrones nun llograron animar al so públicu más fiel

Discoteca Estilo. Nun pudieron atopar meyor llugar Los Berrones pa presentar el so últimu discu, 'Ad libitum', un repertoriu de balaes más afayaíuzu pa una sesión romática de bailles por pareyes que pa un conciertu de 'agrorrock'.

La pista, los rayos de lluz verde y les boles d'espeyos fueron el compangu 'fashion' perfeutu pa un recital que nun pasará a la historia del conxuntu llavianés, nin como'l más animáu, nin como'l de meyor soníu.

Yá lo anunciare'l vocalista Ramón Blanco, en declaraciones a Europa Press, enantes de l'actuación. La so intención yera tocar tolos temes del nuevu discu y únicamente rescatar dalgún gran éxitu por consideranza hacia un públicu que tovía nun se sabe les llibres de 'Ad libitum'. Dicho y fecho. 'Chacho', 'Calcar na tená' y, como non, 'Nun yes tu', p'acabar el conciertu de la forma menos orixinal posible, foron casi los únicos antídotos contra la epidemia de bostezos que, poco a poco, foi adueñándose del respetable.
  
Hai dalgunes canciones nueves que s'acoyeron bien, especialmente 'Carabines y escopetes', basada nuna historia real nel Carmín de la Pola, que recuerda a los tiempos más rockeros de los de Tolivia. 'Vicentón', tema que los yá conocedores del nuevu álbum pasaron mediu conciertu pidiendo, a la voz del so estribillu, 'Vicentón trabaya de Peón', tamién dio ciertu ritmu a la velada. El toque de tonada de 'Yá nun canta'l vaqueru' contribuyó a llevantar los ánimos, cada vez más dormíos, del personal. Pero la mayor parte del restu del 'set list' fizo que la mar de cabeces qu'enllenaba la pista de la Estilo paeciere una balsa d'aceite. Sólo faltaron unos cuantos mecheros n'alto, y el conciertu pasaba per un recital de los Scorpions.
  
Y de remate, una que nun convida precisamente a facer pogos: 'Como un tapín, versión de 'Confortably numb', de Pink Floyd, un gran tema, claro ta, si lu toquen los autores orixinales. En manes de Los Berrones nun tendría por qué sonar mal en direuto, si nun fuere pol mal estáu de la voz de Ramón y el descontrol nel volume de la gaita. Nun foi l'únicu cantar nel que la calidá del soníu brilló pola so ausencia. Les pifies empañaron dellos momentos de l'actuación d'un grupu que tien bien demostrao que pue facelo muncho meyor.
  
Como en toa presentación de discu, nun faltaron les collaboraciones d'otros músicos. Hubo trés. La pimera vino de la mano de Velinu, ex miembru de Los Berrones, y hermanu de Ramón y Tante, que punxo la guitarra y l'armónica en 'Paraísu natural'. La segunda foi la del gaiteru de Dixebra, Llorián García, que tocó la midi en 'Como un tapín'. La tercera nun tuvo nel escenariu, sinón ente'l públicu. Burilo y Xandru, cantante y gaiteru de Skama la Rede, encargáronse de facer posible lo imposible. Animar a la parroquia. El primeru llegó a garrar el micru pa dedicar un 'Puxa' a "los Rolling de la Cuenca", al acabar la de 'Toi que me lleva Dios'.
  
De lo que naide pudo quexase foi de la duración del conciertu. Una hora y media qu'entamó a contar dende la una de la mañana. Cola clientela habitual de la Estilo esperando pa ocupar la pista a ritmu sabrosón, Los Berrones puxeron puntu y final a l'actuación. La orquesta Sonora Real encargóse d'amenizar el restu de la velada, na que los siguidores más mozos de los de Tolivia entemeciéronse colos veceros de la mítica sala de fiesta carbayona, baxando, anque sólo fuere un poco, la media d'edá.