Quieren cesar a Pepe El Ferreiro como direutor del Muséu de Grandas

El consorciu que xestiona’l Muséu Etnográficu de Grandas de Salime, presidíu pola Conseyera de Cultura, va aconceyase esti martes depués de dos años ensin facelu. L’únicu puntu del día ye’l “cese y nomamientu del direutor”, polo que se cuenta con que Pepe El Ferreiro, direutor y creador del reconocíu como un de los meyores museos etnográficos del Estáu, seya apartáu de la so direición.

Nel consorciu tán representaos les conseyeríes de Cultura y Mediu Rural, la Universidá d’Uviéu, Caxastur, l’Ayuntamientu de Grandas de Salime y l’Asociación d’Amigos del Muséu de Grandas. Siendo presidíu pola Conseyera de Cultura, Mercedes Álvarez.
 
José Naveiras Escanlar, más conocíu como Pepe El Ferreiro, foi l’alma mater del Muséu Etnográficu de Grandas de Salime, creáu en 1984 gracies a la gran cantidá d’apareyos tradicionales qu’axuntó y que si nun fuera por él tendríen desapaecío. El Ferreiru yá entamará la so llabor de recopilación etnográfica a finales de los 70.

Depués de más de 25 años dedicáu al muséu, pegoyu de la vida cultural, turística y económica del conceyu (21.000 visitantes en 2009), y de toa una vida dedicada a la conservación de la nuestra tradición, Pepe El Ferreiro va ver, según too paez indicar, como va ser sustituíu ensin esplicación nenguna.
 
Pepe El Ferreiro enxamás nun fue una persona grata pa les alministraciones, entamando pol alcalde de Grandas, el socialista Eustaquio Revilla, quien yá fixo pa sustituilu, o la Conseyería de Mediu Rural, quien fai dos años destituyólu del consorciu del muséu. Tamién foi percríticu con Caxastur pola so curtia aportación económica pal muséu, según afitaba.