El Bloque pide'l reconocimientu nacional de los mapuches

Inaciu González pidió, tres visitar el territoriu mapuche, una reforma de la Constitución chilena pa reconocer los drechos históricos d’esti pueblu. Amás, amosó la so preocupación tres la victoria de Piñera nes eleiciones, “pol so apoyu a los terratenientes y les multinacionales”.

La visita del miembru de la Direición Nacional del Bloque por Asturies foi ente’l 23 d’avientu del añu pasáu y el 9 de xineru d’esti añu, como responsable de movimientos sociales y formación de la organización.. La sida del viaxe yera verificar in situ, la realidá que vive esti pueblu y la llucha que tán desenvolviendo pola defensa de la tierra y los sos derechos ancestrales.
 
Na visita, González visitó a presos políticos en cuatro cárceles, “onde en dalgunes hai denuncies de malos tratos, la comida ta podre o nin siquiera tienen drechu poner un plásticu enriba’l colchón pa tornar la humedá, a parte del castigu que supón tar a cientos de kilómetros de to casa pa una xente que tien lo xusto pa vivir y nun se puen desplazar”, señaló.
 
Según dixo vio como les multinacionales forestales siguen beneficiándose de les concesiones de la dómina de Pinochet, “mientres les comunidaes mapuche que son les dueñes históriques viven en pedacinos pequeños de tierra”. Esclarió tamién que los terratenientes tienen proteición policial pagada col dineru público.
 
Nacho González visitó l'altu Bio Bio, onde Endesa tien proyeutaos cinco banzaos, yá tien fechos dos “y les comunidaes diez años depués siguen ensin cobrar y nin siquiera puen desenterrar a los muertos porque’l cementeriu ta inundáu”, señaló.
 
Tamién comprobó como pel territoriu mapuche pasen les autopistes, les llinies d’alta tensión y hai subestaciones llétriques “ensin contar cola xente que vive ellí”, y como’l 80% de los vertederos tán en medio de les comunidaes mapuche y “hai xente que tien que vivir ente la basura”.
 
Por too esto y según les demandes del pueblu mapuche señaló que ye necesario “la reforma de la constitución chilena y el reconocimientu d’un estáu plurinacional, onde se recueyan los derechos históricos del pueblu mapuche, que vienen de cuando la conquista española”.
 
Tamién que s’acabe cola llei antiterrorista “que vien de cuando gobernaba Pinochet y que permite tolos montaxes policiales y xudiciales como que pueda declarar xente tapao, que nun se sabe quiénes son y que condenen a mapuche que demuestren tar el día de los fechos a cientos de kilómetros”.
 
Del mesmu mou, acabar col conflictu pol territoriu devolviendo les tierres a los mapuches. Asina como que se respeten les formes d’organizase del pueblu mapuche, amás de la so llingua y la so cultura.
 
Amás, fixéronse ecu de les recomendaciones del Relator Especial de Naciones Uníes, James Anaya, pidiendo al Presidente electu de Chile establecer un mecanismu efeutivu que reconoza’l drechu de los pueblos indíxenes a la tierra y los recursos naturales.
 
Nacho González tamién quixo amosar la so preocupación pola victoria de Sebastián Piñera nes eleiciones del domingu pasáu, “pues nel so programa apuesta claramente pola represión y la marxinación pal pueblu mapuche, y l’apoyu total pa los terratenientes y les multinacionales qu’esploten la tierra y condenen a la emigración y a la probitú a la población mapuche”.