Carlos Pulgar; “Nengún presidente tuvo enfotu en da-y futuru al asturianu”

Carlos Pulgar (Ḷḷena, 1975), ye llicenciáu en Xeografía ya Historia y ye, dende va más d’un añu, voceru de la Xunta pola Defensa de la Llingua Asturiana. Asturies.com faló con él sobre la situación del idioma y del propiu movimientu de reivindicación llingüística.

¿En qué actividaes trabaya anguaño la XPDLLA?
 
Dientro poco entamamos un cursu d’asturianu, una actividá yá tradicional que tien muncha demanda. Igual facemos más alantre ún más curtiu d’afondamientu, que ye un pidimientu de los matriculaos. Tamién tamos preparando yá’l Conciertu pola Oficialidá, buscando’l sitiu más amañosu. Sicasí, tovía nun podemos falar de grupos, queremos qu’haya dalguna novedá na escenografía, pero tovía nun tal cartel zarráu.
 
¿Esti añu habrá cantar de Músicos pola Oficialidá?
 
Ye bastante probable, anque tamos dando-y vueltes a la presentación, queremos dalgo más interactivu. Los músicos siempre collaboran y Xune Elipe siempre tira muncho por ello.
 
La Xunta ta dientro del CAO, ¿cómo valores la campaña de Doi la Cara pola Oficialidá?
 
La Xunta lleva un pesu importante nes campañes del CAO, la valoración d’esta iniciativa ye positiva porque abrió la reivindicación a xente que nun taba presente nel movimientu. Amás, ye una campaña más novedosa que les tradicionales, que vamos siguir faciéndoles, pero hai que da-y visibilidá a la reivindicación nes nueves tecnoloxíes, onde la presencia del asturianu ye mui importante. Agora queremos da-y otra vuelta a la campaña pa da-y un emburrión, yá que col pasu del tiempu va dexando de ser novedá. Dientro de poco vamos xubir dalgunes semeyes de xente famoso.
 
¿Nun hai ciertu parón nel CAO?
 
El CAO pidía la oficialidá na reforma del Estatutu, que se pensaba que diba durar un par de meses, pero ésto yá lleva seis años y tien pinta de durar más. Ye imposible mantener la tensión reivindicativa como’l primer día. Lo qu’hai que facer son campañes como la de Doi la Cara, que mantengan el tema na cai, y llendar la máxima reivindicación pal procesu de reforma.
 
¿Nun camientes que sería bono siguir falando colos políticos?
 
El CAO fala davezu colos políticos, manteniendo contactos con ellos y viendo como piensen. Lo que pasa que nun ye una actividá tan visible. Tamién hai que tener en cuenta que l’Estatutu va reformase na próxima llexislatura y los representantes políticos yá nun van ser los mesmos.
 
Fai muncho que nun vemos a La Pita, ¿ónde ta?
 
La Pita tuvo una presencia mediática mui efeutiva, pero nos últimos tiempos los medios nun averaos al asturianismu nun-y facíen muncho casu. La Pita descansa nos cuarteles d’iviernu pa da-y un impulsu y que cuando salga seya efectiva. Hai qu’utilizala cuando veas que ye más útil y mediática.
 
¿Yá ta la filoloxía asturiana ganada?
 
Falta un escalón por consiguir, que ye que l’Axencia Nacional d’Evaluación de la Calidá y Acreitación (ANECA) apruebe en Madrid esos estudios. Va años yá foi aprobada la filoloxía asturiana equí y llueu en Madrid, lo qu’agora ye l’ANECA y enantes yera’l Conseyu d’Universidaes, refugóla por politiqueos. El camín ta a mediu andar y falta l’últimu cachín, hasta que nun entamen a dar les clases nun podremos dicir que ta consiguida.
 
¿Qué te paez Gotor no que cinca a la llingua na Universidá?
 
Partimos de la base de que los qu’hubo enantes nun fixeron nada, polo que por poco que faiga yá va ser más. Fixo dalguna cosina y paez que reflexonó sobre la presencia del asturianu na Universidá, pero tovía falten compromisos sobre la normalización del idioma na institución. Gotor tien una actitú positiva, pero falta un pasu importante.
 
Gotor dixo que quería crear una comisión sobre la normalización del asturianu na Universidá, ¿va tar la Xunta nesa comisión?
 
Tamos teniendo contactos col Rectoráu, tenemos interés en tar nesa comisión y cuntar lo que pa nós ye la normalización del asturianu na Universidá. Tovía nun se sabe cómo y pa que va ser esa comisión, pero a la Xunta interésa-y tar onde se trate la situación de la llingua.
 
Va un añu la Xunta y Xuristes pol Asturianu entamabeis un trabayu conxuntu pa que les alministraciones cumplieren cola Carta Europea de Llingües Minoritaries, ¿cómo se desendolcó esa iniciativa?, ¿sigue anguaño vixente?
 
Ye un llabor de coordinación importante, trátase d’axuntar una serie d’intereses que defender. Fai unos meses tuvimos un aconceyamientu con un representante del Conseyu d’Europa y dientro de poques selmanes vamos presentar una iniciativa pa dirixise direutamente al Gobiernu estatal, que ye quien tien que cumplir la Carta Europa de les Llingües Minoritaries.
 
¿Qué te paez Consuelo Vega como encargada de la Política Llingüística?
 
La Xunta yá valoró’l so trabayu. Cenciellamente lo que fai nun ye política llingüística, ye la encargada d’una oficina onde fai dalgún llabor de promoción cultural. La política llingüística intervién nel sistema educativu, nos medios de comunicación y na alministración, onde Consuelo Vega nun pintó nada nestos años.
 
¿Foi meyor Ramón d’Andrés?
 
En resultaos los dos son asemeyaos, el gran llogru en la normalización ye l’avance na toponimia, nel restu tán pareyos. Sicasí, con Ramón d’Andrés notábase más ambición nos sos planes y qu’había un techu per riba que nun-y dexaba facer. Con Consuelo Vega nun se ve gran ambición, nin siquier faló del tema de la filoloxía asturiana o de la presencia de la llingua nos medios de comunicación públicos.
 
¿Qué opinión tienes sobre la TPA?
 
El tratamientu que fai del asturianu ye malísimu, como si fora un centru territorial y non la televisión pública d’Asturies. Ye evidente que la direición de la TPA nun quier que l’asturianu se normalice gracies a la televisión, por eso namás tienen el requexu del bable. Camiento que la TPA, mientres nun incluya l’asturianu ta condergada al fracasu. La canal pública llegó tarde y nun conecta cola sociedá. Inclús hai coses preocupantes, como que paguen millones d’euros pa emitir la Lliga de fútbol que tamién emite LaSexta y en llugar de facelu n’asturianu, pa ufrir al espectador dalguna novedá, lo faen en castellán. La TPA ye la crónica d’un fracasu anunciáu, gastando perres en coses que nun conecten cola ciudadanía. La presencia del asturianu ye tán mala que tenemos que lluchar por que cumplan cola llei y usen la toponimia aprobada pol Gobiernu, cuando tendríamos que lluchar por una mayor presencia del asturianu.
 
¿Hai dalgún tipu de collaboración con organizaciones de Lleón?
 
La Xunta organizó hai dalgunos años los Alcuentros nel Cordal, esti añu tenemos intenciones de facer dalgo asina pa la seronda. Nós siempre vamos tar al llau de la xente que trabaye pol futuru del idioma y que lo faiga realmente pola llingua, ensin entrar n’intereses políticos. Eso sí, abondo tenemos en casa, polo que ye percomplicáu trabayar n’otres zones onde la situación de la llingua ye peor.
 
¿Cuál pienses que foi’l peor presidente pa la situación del asturianu?
 
Foron toos mui malos. Nengún de los presidentes que tuvimos hasta agora tuvo enfotu colos drechos de los falantes y con da-y futuru a esti idioma. Tolos presidentes merecen un xustu escaezu.
 
L’añu pasáu la Xunta cumplía 25 años, ¿nesti cuartu de sieglu que s’algamó?
 
La situación social del idioma dio un reblagu importate, dende’l puntu de vista cultural hasta la propia consideración llingüística, llegando a casi tola sociedá, esti foi’l gran llogru del asturianismu. Lo que pasa qu’esto nun foi acompañáu de drechos llingüísticos.