Chávez encamienta a Obama entamar un diálogu con Llatinoamérica

El presidente de Venezuela encamentó al so homólogu estaunidense, Barack Obama, a pesllar les bases militares que ta acabante d'instalar en Colombia y a entamar un diálogu sobre esti tema colos gobiernos d'Américan Llatina, si ye que desea "facese merecedor" del Premiu Nobel de la Paz.

"Ún de les coses que debería facer Obama pa facese merecedor d'esti premiu ye imponese a la llinia guerrerista del Pentágonu norteamericanu. Debería zarrar les bases militares en Colombia y establecer unes bases de paz", afirmó Chávez dende Bolivia.
  
El mandatariu venezolanu insistió en que tien pruebes que demuestren que les siete instalaciones militares colombianes serán utilizaes como "bases de guerra" pa promover un enfrentamientu internacional.
  
"A Obama nun-y queda otru camín qu'eliminar les bases y volver al diálogu p'apagar el granu ruiu xeneráu a instancies de (Álvaro) Uribe y de la oligarquía colombiana", repitió Chávez, momentos antes d'asistir a la investidura del so par bolivianu, Evo Morales.
  
La Casa Blanca y Bogotá firmaron n'ochobre del 2009 un acuerdu que permitirá a EE.UU desplegar unos 1.400 soldaos y contratistes en siete bases colombianes nel marcu d'un nuevu pactu militar que busca derrotar el terrorismu y el narcotráficu promovíu polos grupos armaos.
  
El conveniu criticólu duramente y refugólu la mayoría de los países de Sudamérica qu'exixeron a Uribe esplicar con detalles les verdaderes intenciones de les estratexes militares que se desarrollaron en dellos puntos del territoriu colombianu.
  
"La verdadera guerra que debemos llibrar ye trabayar na llucha contra la miseria, la probitú y provocar el desarrollu económicu de les nueses naciones", repitió Chávez, con un gobiernu vinculáu cola guerrilla de les Fuerzas Armadas Revolucionarias de Colombia (FARC).
  
El xefe d'Estáu venezolanu consideró que "la solución pal conflictu armáu de Colombia tien de ser política y non militar", al recordar los alcuentros que caltuvieron funcionarios del so Gobiernu coles FARC, l'Exércitu de Lliberación Nacional (ELN) y con cabezaleros paramilitares.
  
"Eso xeneró que tengamos muertos y firíos nes nueses files, pero ficímoslo pa qu'estos nun entren nel nuesu territoriu", esclaró.