Defenden que'l vertederu en Cenero muestra alternatives a la incineradora

La Coordinadora Ecoloxista d'Asturies defendió güei que'l proyeutu d'un nuevu vertederu industrial en Cenero (Xixón) demuestra qu'hai alternatives a la incineradora.

Asina, el colectivu caltién que "la rapidez" p'alcontrar la ubicación del vertederu demuestra "la continua falsedá de que los vertederos n'Asturies tán acabando como únicu argumentu pa colocamos la peligrosa incineradora como única solución de tratamientu pal futuru".
  
La Coordinadora apuntó que yá entamó "la tramitación ambiental d'un nuevu vertederu de residuos industriales asimilables a urbanos, pa que la empresa Asturiana de Zinc vierta 562.000 tonelaes al añu". Según indica'l coleutivu en nota prensa, asitiaríase en Carbaínos, un barriu de la parroquia de Cenero, nel conceyu de Xixón.
  
"Esti nuevu vertederu de residuos industriales asitiaráse al Suroeste de Xixón, próximu a los conceyos de Llanera y de Siero, al Oeste del llugar pasa'l ríu Aboño, y al Norte'l regatu de Veranes, al este el ríu Pinzales y al sur el regatu de Peñaferruz. Tien accesu peles carreteres AS II y AS-18 (víes qu'unen Xixón y Uviéu)", apunta la Coordiandora.
  
Poro, calca en que "n'Asturies hai munchos más vertederos que los que mos dicen pa los diferentes residuos que xeneramos". "Demuéstrase que cuando quieren apaecen vertederos apropiaos", añade al tiempu que defende "unes polítiques más actives de reducción, de reutilización y de reciclaxe".
  
A lo último, la Coordinadora destaca que la incineración "nun ye sólo la más peligrosa de les opciones de tratamientu de residuos, ye la más cara pa los ciudadanos, la que menos emplegu xenera, la que destrúi les materies primes presentes nos residuos, que presenta un desfavorable balance enerxéticu, precisa un vertederu pa escories y cenices".