Los Berrones presenten el so nuevu discu 'Ad libitum'

Los Berrones presentarán güei'l so nuevu discu, 'Ad libitum', nun conciertu na Sala Stilo d'Uviéu, pal que preparen una actuación na qu'interpretarán los 14 cantares d'esti últimu trabayu, el so séptimu álbum d'estudiu.

El grupu lleva repartíes más de 300 invitaciones pa l'actuación d'esta nueche, pa la que tamién se pondrán entraes a la venta na mesma sala, que continuará cola so nueche de fiesta avezada dempués de l'actuación. L'entamu del conciertu ta previstu pa les 24.00 hores.
  
Según comentó a Europa Press el vocalista, Ramón Blanco, la idea del grupu yera tocar sólo cantares del últimu trabayu, pero teniendo en cuenta que ta acabante de publicase y el públicu nun va conocer munchos temes, decidieron intercalar nueves y vieyes creaciones.
  
'Ad libitum' consta, como suel ser vez nel grupu de Tolivia, de temes de rock con varies temátiques diferenciaes, pero nes que predominen trés llinies básiques: la ironía, la crítica, los problemes sociales y el mundu rural. Esti últimu aspectu, siempre presente nel 'agrorrock' del conxuntu llavianés, cultívase en dos cantares: 'Pueblos pequeños', que fala sobre les rencielles y malos quereres de los pueblos y les aldees, "que munches veces paecen idílicos", comenta Ramón, y 'Yá nun canta'l vaqueru', sobre l'antigua costume de los pueblos de subir a catar les vaques al monte, y la interactividá que se creaba nesti llabor.
  
Otros temes que destacó' vocalista son 'Paraisu natural (?)', que "desmitifica la idea d'esa asturies paisaxística que tenemos y que nun cuidamos", 'Ciudad Juárez', sobre la desapaición de muyeres nesta ciudá de México, 'Caverna d'usureros' o 'Toi que me lleva Dios'.
 
Versión de Pink Floyd
  
Ún de los temes nos que más calcó'l cabezaleru de Los Berrones ye l'últimu, tituláu 'Como un tapín' y que ye una versión del tema 'Confortably numb', de Pink Floyd, nel que fala d'un rapaz que "nin siente nin padez, que ta fechu polvu", nun paralelismu con Syd Barret, vocalista del grupu inglés.
  
Ye la tercer versión de la historia de los de Llaviana. Nel so anterior discu, 'República independiente de Tolivia', incluyeron 'Puente sobre agües braves', adautación del mesmu tema de Simon & Garfunkel, y anteriormente ficieren la so célebre 'Atrulláu', versión de 'Atrapado', de los Stukas.
  
'Ad libitum', grabáu nos estudios Acme (Miranda-Avilés), ye'l primer trabayu autoproducíu por Los Berrones, que tán nestos momentos dedicaos a la so distribución. L'álbum yá ye líder de ventes na FNAC, igual que lo fuere l'anterior. Güei podrá tamién mercase na sala del conciertu.