La fuelga pol gallegu tien un siguimientu del 90%

Un 90% de siguimientu na fuelga del enseñu y unes 60.000 persones nes cais de Compostela. Estes son les cifres de la plataforma Queremos Galego nun día de reivindicación contra’l decretu del gallegu que quier impulsar el gobiernu de Feijóo.

Según los organizadores, ente 60.000 estudiantes y profesores enllenaron les cais de la capital de Galicia nun día llaborable. Mientres que la fuelga nel enseñu non universitariu foi siguida pel 90% de los profesores de la educación pública. Sicasí, dende CCOO fálase del 70% y dende la propia Xunta de menos del 50%.
 
La manifestación entamó na Alameda de Compostela a les 11.30 hores, encabezada por una pancarta onde se lleía “Paremos el decretu contra’l gallegu”, y llegó hasta la Plaza del Obradoiro, onde Carlos Callón, presidente de la Mesa pola Normalización Llingüística lleó’l comunicáu final. Nel testu, falóse de la necesidá de la inmersión llingüística en gallegu, “como pasa en toles comunidaes con llingua propia”.
 
La manifestación taba sofitada pol PSOE gallegu y el BNG, cola presencia de militantes destacaos d’estes organizaciones, como los dos principales líderes de la oposición, el socialista Manuel Vázquez y el nacionalista Guillerme Vázquez.
 
En declaraciones a los medios mientres s'organizaben los diferentes grupos de la marcha en La Alameda, Carlos Callón, celebró la "respuesta unánime" de la sociedá frente a aquéllos que tacharon de "radicales" a los defensores del gallegu, ye dicir, a los que "reivindiquen que se cumpla la llexislación vixente" de magar l'aprobación de la Llei de Normalización Lingüística.

"Equí tán, toos sindicatos y profesores, toles organizaciones estudiantiles, tolos movimientos d'educación pedagóxica, tola comunidá educativa. Nun pue ser que'l gobiernu gallegu, de Feijóo, continúa cola política agresiva, a pataes, contra l'idioma propiu", destacó Callón, tres indicar qu'al eventu acudieron unos 170 autobuses y "más" que na del 18 d'ochobre, qu'axuntó a unes 50.000 persones.
  
El voceru de la CIG-Ensino, Anxo Louzao, consideró "un fechu históricu" l'apoyu de la ciudadanía  la movilización y que demuestra'l "refugu a unes bases que lo que pretenden ye desaniciar el gallegu na enseñanza". Nesta llinia, el responsable d'aición sindical de STEG -ún de los sindicatos convocantes de la fuelga na enseñanza-, Xosé Cabido, señaló que "les imaxes falen por sí mesmes", y condicionó'l fin de les protestes "a que se detenga'l decretu". "Que se mos dexe educar, convivr y deprender la llingua", acabó.
  
La cabecera llegó a la Praza do Obradoiro aproximadamente a les 12.15 hores y, media hora más tarde, la cola de la manifestación tovía nun saliere de La Alameda. De fechu, los sindicatos CC.OO y UXT quedaron fuera de la plaza, igual que'l PSdeG, que tardaron cerca de dos hores n'algamar l'Obradoiro.
  
En declaraciones a los medios, el secretariu xeral de FETE-UGT, Marcelino Brea, señaló la "inaplicabilidá de les bases" de la Xunta nos centros y, "poro, el deterioru -que supondrán- de les condiciones llaborales de los profesionales de la enseñanza". Pela so parte, el secretariu d'Aición Sindical de Ensino de CC.OO, José Fuentes, confió en que "Feijóo tome nota d'esta manifestación, tan grande, enorme" y "a la escontra de la postura del PP, unillateral".
 
Actu Central
  
Demientres l'actu central celebráu ante una multitú de mozos que llenaron la Praza do Obradoiro, el voceru de la plataforma 'Queremos galego', Fran Rei, esclaró que "naide vino -a la manifestación- con nenguna pistola na cabeza". Amás, aseguró que la so entidá llevará "a los tribunales" al que "miente y al que difame" -n'alusión al PPdeG- sobre la "defensa del idioma".
  
Rei destacó tamién la participación especial del presidente de l'Asociación Internacional d'Estudos Galegos, Craig Patterson, qu'a la so vez acusó a la Xunta d'usar la introducción del inglés "propagandísticamente" pa "camuflar" l'ataque al gallegu.
  
Pela so parte, el presidente d'A Mesa pola Normalización Lingüística y tamién voceru de 'Queremos galego', Carlos Callón, destacó que la sociedá acudió a movilizase "a pesar de les declaraciones insultantes" sobre la convocatoria per parte de dalguna organización.
  
D'esta  manera, realizó un llamáu a los titulares d'Educación, de Cultura y al presidente da Xunta, Alberto Núñez Feijóo, a retirar el so "odiu" a la cultura y llingua gallegues, tres alvertir que la plataforma llamará "a la desobediencia" del decretu -si se llega a aprobar-, col fin de cumplir "la Llei de Normalización Llingüística y la Carta Europea de les Llingües Minoritaries". A lo último, los participantes nel "históricu" eventu que llenaben l'Obradoiro, entonaron l'himnu gallegu.

La de güei yera la cuarta manifestación pol idioma gallegu dende que Feijóo foi nomáu presidente. La primera axuntó a 40.000 persones el 17 de mayu de 2009 cola sida del Día de les lletres gallegues, la segunda, el 18 d’ochobre sumó 50.000, la tercera namás xuntó unos miles de manifestantes. Sicasí, foi de les más significatives yá que se convocó en hores, al anunciar la Xunta la presentación del nuevu decretu’l 30 d’avientu nun intentu por rebaxar al mínimu la contestación social.