El PCE entama una campaña pa pidir tresparencia nes cuentes de la Casa Real

El PCE entamó una campaña de recoyida de firmes que, baxo'l títulu '¿En qué gastas mi dinero?', tien como oxetivu reclamar tresparencia nes cuentes de la Casa Real. La recoyida de firmes entamó a les 12 del mediudía na Puerta'l Sol.

Según esplicaron fontes del PCE, nes dos hores demientres les que teníen permisu del conceyu pa tar instalaos nesti llugar, llograron más de 300 firmes de simpatizantes cola causa. Nel momentu de recoyer el tenderete, a les dos de la tarde, una cola de xente esperaba pa estampar la so firma, dalgo que nun pudo facer a lo último nesi momentu.
 
Poro, les fontes consultaes aseguraron qu'ente los ciudadanos hubo reaiciones de tou tipu, pero en xeneral afirmaron que se pue falar de "aceptación bastante". Na Puerta del Sol tamién tuvieron presentes el secretariu xeneral del PSM, Ramón Sanz, conceyales d'IU del Conceyu de Madrid, una representación d'IU Federal y sindicalistes del sector críticu de CC.OO.
  
De magar agora la campaña prosigue en toa España, por tolos conceyos y n'internet, hasta 9 d'abril, fecha tope elixida pol PCE. Les firmes recoyíes demientres los próximos tres meses treslladaránse al Congresu pa la so tramitación na Comisión de Pidimientos al Grupu d'IU de manera qu'esta propuesta se lleve a un alderique parlamentariu.
 
Nueve millones d’euros ensin xustificar
  
El PCE destaca que l'añu pasáu la Casa Real disfrutó de nueve millones a cargu de los Presupuestos Xenerales del Estáu, un 2,7 por cientu más que l'añu anterior, a pesar de la crisis. Amás, el partíu recuerda que según la prensa belga, Xuan Carlos I ocupa'l tercer llugar en fortunes y patrimonios, calculaos en 1.700 millones d'euros, nel ranking de les Cases Reales europees.
  
"Naide sabe cómo se distribúi esi dineru, en qué cantidaes lu reparten, nin en qué lu empleguen. Nin los diputaos, nin el Tribunal de Cuentes, nin la Fiscalía, nin los tribunales, nin siquier la Comisión de Secretaos Oficiales tienen accesu a dicha información. Dende'l PCE pidimos que les cuentes de la Casa Real seyan tresparentes y tean sometíes al control públicu. La tresparencia tamién debe llegar a les donaciones y regalos que recibe'l rei na so condición de Xefe d'Estáu", sorraya.