El Reglamentu nun convence

Tres que Xuristes pol Asturiana impugnara’l reglamentu que regula les comunicaciones n’asturianu cola Universidá, la XPDLLA y CUPA amuesen el so paecer sobre’l testu.

Xuristes pol Asturianu formalizaba énte’l Tribunal Superior de Xusticia d’Asturies el pasáu 8 de xineru, una demanda contra l’aprobación del Reglamentu de la Universidá d’Uviéu pa la presentación y receición d’escritos n’asturianu, yá que, según l'asociación, l’Alcuerdu contradiz drechos llingüísticos reconocíos na Llei d’usu y nel Estatutu.
 
Carlos Pulgar, voceru de la Xunta pola Defensa de la Llingua, ensin entrar a valorar la impugnación de Xuristes, camienta que nun ye lóxicu qu’un reglamentu d’una parte de l’alministración acote un drechu que yá ta reconocíu por una llei superior. Poro, esclaria que “se pon n’entredichu lo reconocío por una llei aprobada va una docena d’años”, en referencia a la Llei d’Usu.
 
Mientres, el Conceyu Universitariu pol Asturianu camienta que siempre ye positivo qu’una reglamentación pase pela peñera d’una sentencia xudicial, “porque asina s’aclarien les posibles duldes o errores del llexislador”. Señalen que, en casu de qu’AXA tenga razón, l’equipu rectoral habrá camudar esti testu acordies col mandáu xurídicu que se determine nos tribunales.
 
Carlos Pulgar señala que la Universidá d’Uviéu, “como parte de l’alministración asturiana”, namás tien que cumplir cola normativa vixente, yá que “la Llei d’usu yá reconoz el drechu de los ciudadanos a dirixise a l’alministración n’asturianu.
 
Dende’l CUPA esclarien que vieron como un pasu alantre, l’aprobación del Reglamentu, “anque amosamos el nuesu desalcuerdu con dellos puntos del mesmu al equipu rectoral”. Sicasí, afiten que nun creen que se tenga qu’entender el recursu “como un ataque a la política llingüística del equipu rectoral, sinón como un desalcuerdu en términos xurídicos con una cuestión concreta”, señalen.
 
La Universidá d'Uviéu aprobaba’l so Reglamentu’l pasáu 28 de mayu de 2009. Nél, contémplase la posibilidá de presentar escritos n'asturianu al traviés del rexistru de la institución. Sicasí, la respuesta per parte de la Universidá va ser siempre en castellán. Del mesmu mou, anque s’acepta de forma parcial nel usu alministrativu, nun ye asina pal usu académicu, que sigue vetáu pa la llingua del país.