El PP gallegu quedó solu na defensa del so llamáu “decretu del prurillingüísmu”, una norma que recurtia enforma la presencia del gallegu nel sistema educativa y que nun ta algamando’l prometíu consensu pol que puxaba Feijóo. Partíos, sindicatos, instituciones, RAG y la mesma Galicia Bilingüe, amosaron nun tar d’alcuerdu col testu.

Mañana xueves 21 de xineru, tola comunidá del enseñu non universitariu en Galicia (35.000 profesores y 270.000 alumnos) tán llamaos a una fuelga contra la reforma del decretu de llingües, la norma que recueye la presencia del gallegu nes sistema educativu. Asina, la comunidá educativa amuesa la so refuga a la política llingüística de Feijóo.
 
La convocatoria de “Queremos Galego” (El CAO del país vecín) entamará a les 11.30 hores na Alameda de Santiago de Compostela y quieren amosar, baxo’l llema “Paremos o decretazo contra o galego”,  la refuga de la sociedá gallega a la norma, esclariando que col nuevu decretu nun se va permitir un bon conocimientu del idioma na educación, porque vulnera tola llexislación vixente y porque, too según los colectivos, va ser la primer vez que’l gobiernu gallegu dea pasos p’atrás na normalización llingüística.
 
Col nuevu decretu, nel país vecín habrá una educación en gallegu, castellán ya inglés a partes iguales. Amás, los padres participarán na eleición del idioma pa cada materia. Nel momentu de formalizar la matricula, decidirán el modelu llingüísticu del centru escolar. Mientres que na educación infantil va consultase añalmente, nel restu de niveles la eleición tendrá llugar cada cuatro años. Nel casu de Primaria, Matemátiques y Sociales nun podrán ser impartíes nel mesmu idioma, una será en gallegu y otra en castellán.
 
Cuando nun haya profesoráu abondo pa impartir un terciu de materies n’inglés, los padres escoyeran les materies d’esa parte proporcionalmente nos idiomes oficiales. Na FP los centros garantizarán la igualdá de competencies nes dos llingües oficiales, según afita’l decretu.
 
El pasáu llunes, la Real Academia Galega dicía que’l nuevu decretu yera inaceptable y pidía la so retirada. Tamién les tres universidaes gallegues (Compostela, La Coruña y Vigo) publicaron un comunicáu conxuntu esclariando que col nuevu decretu los escolinos nun diben deprender bien la llingua de Rosalía.
 
Mesmamente güei, decanos de dellos Colexos d’Abogaos, catedráticos, profesores d'universidá, xueces y fiscales de toa Galicia, alvirtieron a la Xunta que’l so decretu podía ser inconstitucional, yá que los padres tienen drechu a elixir sobre la educación moral o relixosa, “pero non sobre la llingua”.
 
El PP yá cuntaba cola refuga de sectores galleguistes, pero non col del PSOE, que diz que nun va aceptar un decretu nel que’l gallegu nun tenga una presencia d'a lo menos el 50%. Inclús el Ministru de Xusticia, el gallegu Francisco Caamaño dixo que'l borrador del decretu del gallegu na enseñanza nun pue tratar igual a dos llingües oficiales qu'a un idioma estranxeru.
 
El Ministru llegó recomendar a Feijóo, que "piense nes consecuencies d'esti nuevu billingüismu" y que tome en consideranza "la llamada d'atención" de la sociedá, tanto al traviés de les distintes manifestaciones como del "día a día" de les instituciones culturales, “porque nun pue crease un problema onde nun lu hai".
 
Pero amás de los defensores de la normalización llingüística, tamién s’amuesen a la contra de la nuevu norma los que refugaron l’anterior decretu, aprobáu por PSOE y BNG, y denunciaron la supuesta marxinación del castellán na llexislatura anterior. Asina, l’asociación Galicia Bilingüe nun quier el nuevu decretu y diz sentise engañada por Feijóo, quien prometió que los padres podríen escoyer la llingua y asina, poder estudiar dafechu en castellán.
 
Col decretu anterior les escueles impartíen les asignatures nel idioma mayoritariu del escolín, siendo’l profesoráu’l qu’afitaba la llingua más usada ente los alumnos al traviés d’encuestes sociollingüístiques. Mientres, nos graos superiores establecíase un mínimu del 50% de materies en gallegu. Esi testu fora aprobáu pol bipartitu PSOE-BNG en 2007 y nél participó’l PP hasta’l momentu de la so aprobación.