Los ecoloxistes esixen el control de la contaminación acústica

La Coordinadora Ecoloxista d’Asturies vien de solicitar a Mediu Ambiente l’entamu del cumplimientu de los oxetivos de calidá acústica poles 66 instalaciones industriales que tuvieron que superar el trámite.

Pa los ecoloxistes, la contaminación acústica ye una de les más importantes del país “pola proximidá de munchos complexos industriales a zones residenciales”. Poro, soliciten un procesu de control con midiciones acústiques de los niveles de ruíu, p’asina “meyorar la vida de los ciudadanos y les condiciones de trabayu de los emplegaos”.
 
Esclarien que’l cumplimientu de la calidá acústica afitada poles Autoridaes Ambientales Integraes (AAI) supón que l’algame de les autorizaciones ambientales nun ye “la fin del procesu, sinón el pasu d’entamu pa la modernización y un desendolcu sostenible a escala asturiana”.
 
Los ecoloxistes señalen que les alministraciones tienen que puxar pola integración de les meyores téuniques disponibles nos procesos productivos, “garantizando asina la sostenibilidá ambiental y económica del nuesu texíu empresarial”.