Los grupos ecoloxistes asturianos vienen d’amosar en conxuntu, les sos duldes sobre’l Proyeutu Frañagüesos del Principáu, yá que la recuperación d’una especie “nun pue ser a cualesquier preciu” y primeru hai qu’atender les especies que tovía esisten n’Asturies y cuerren peligru, anque nun s’oponen a la introducción de la especie “al traviés de la metodoloxía axeitada”.

En conxuntu, Coordinadora Ecoloxista d’Asturies, Coleutivu Ecoloxista d’Avilés, Asociación pa la Defensa Xurídica del Mediu Ambiente "Ulex", Salternavia, Grupu de Recuperación y Estudiu de Espacios Naturales, Plataforma pa la Defensa de la Cordalera Cantábrica, Asociación pa la Conservación y Estudiu del Llobu Ibéricu, Grupu Ornitoloxia Mavea, Coordinadora Ornitoloxica d’Asturies y L’Aliaga, cuestionen el proyeutu de la Fundación pa la Conservación del Frañagüesos (FCF).

Pa los ecoloxistes asturianos, la FCF quier reintroducir esta especie nel Cordal Cantábrica col sofitu del Principáu “espoliando nieros que consideren inviables, alegando que provienen de pareyes qu’acumulen fracasos, pero ensin acreditalu por un especialista, lo que pon en peligru a la población donante que vien d’Aragón”.
 
Del mesmu mou señalen la falta d’eficacia de lliberar nieros nos Picos d’Europa criaos artificialmente, “yá que yá morrieron tres aves con esti procedimientu”. Señalen que’l propiu Ministeriu de Mediu Ambiente tien delles actes onde fala de la invalidez téunica del proyeutu de ka FCT.

Pa los ecoloxistes asturianos, nun debe ponese en marcha’l Proyeutu Frañagüesos mientres nun s’estudien otres alternatives, yá que nun ye de valir mientres “quienes lo sustenten sigan tracamundiando les crítiques en llugar de trabayar pa superar les deficiencies”.
 
Los ecoloxistes señalen que la so prioridá ye que primeru hai que preocupase de les especies que tovía esisten n’Asturies y de les condiciones de los sos hábitats pa que nun desapaezan. “y depués d’ehí entamar a recuperar lo perdío ensin asumir más riesgos de los necesarios”.
 
Poro, los ecoloxistes camienten que’l proyeutu de reintroducción del frañagüesos nel Cordal Cantábrica nun ye de valir técnicamente, nun ye económicu y ye incompatible cola conservación de la propia especie.