El presidente de Sudán aceptaría la independencia del sur por referendu

Omar Hassan al Bashir afirmó qu'apoyará al sur de Sudán si elixe independizase nel referendu que se celebrará l'añu que vien, no que supón la primer ocasión na que fala de la posibilidá d'una separación.

El discursu llega mientres Sudán celebra'l quintu aniversariu del acuerdu de paz firmáu nel 2005, qu'acabó con más de dos décades d'una guerra civil ente'l norte y el sur. Espérase que los habitantes del Sur de Sudán elixan la independencia nesti referendu previstu pa xineru del 2011.
  
Al Bashir aseguró de la mesma manera a los dirixentes aconceyaos na ciudá de Yambio, nel sur del país, que'l gobernante Partíu Nacional del Congresu (NCP) tovía quier caltener unificáu'l país. "Pero si'l resultáu del referendu ye la separación (...), el Gobiernu de Jartum será'l primeru en reconocer esta decisión", afirmó. "Apoyaremos el nuevu Gobiernu del sur", aseguró.
  
Les midíes de seguridá yeren mui elevaes mientres Al Bashir falaba nel estadiu de Yambio, cerca de la frontera cola República Democrática del Congo (RDC). Mientres, el presidente del Sur de Sudán, Salva Kiir, qu'intervino nel mesmu conceyu, desestimó les preocupaciones de que'l referendu del 2011 puea llevar a un enfrentamientu col norte.
  
"Dexáime ser claru (...), hasta si'l sur decide separase del norte nel 2011, nun va dividise nel océanu Índicu, nin nel Atlánticu (...). Vamos preparamos p'asumir el resultáu del referendu de manera pacífica", declaró a la multitú.
  
"El cursu del ríu Nilo siguirá de sur a norte (...), los nómades árabes continuarán buscando pastos y agua nel Sur de Sudán y naide pensaría en negar estos derechos", afirmó.
  
L'acuerdu de paz del 2005 creaba un Gobiernu semiautónomu nel sur, repartía de la riqueza petrolífera del país y prometía la celebración d'un referendu, asina como elecciones nacionales, previstes p'abril.