Medra la producción ecolóxica n'Asturies

La superficie agroganadera destinada a producción ecolóxica medró nel 2009 un 19% y la producción de la xata asturiana ecolóxica, el so elementu estrella, aumentó un 51%, con un total de 154.995 kilogramos.

Son datos qu'ofreció güei'l conseyeru de Mediu Rural y Pesca, Aurelio Martín, demientres una rueda prensa ofrecida pa facer el balance del pasáu añu del Conseyu de la Producción Agraria Ecolóxica d'Asturies (Copae), na que compareció acompañáu del presidente d'esti órganu, Javier González Aguilar.
  
Según los datos en poder del representante autonómicu, el númberu d'operadores nel 2009 creció un 12%, pasando de los 328 operadores nel 2008 a los 368, de los que 286 son productores y 82 ellaboradores. Amás, pasóse de 11.800 hectárees utilizaes a últimos del 2008 a dalgo más de 14.000 nel 2009.
  
No que cinca a la xata ecolóxica asturiana, el "productu estrella" en palabres del conseyeru, llegaron a los mataderos 685 reses de producción ecolóxica, un 40% más que nel 2008. El númberu de kilos certificaos nel 2009 foi de 154.995, lo que representó un  incrementu del 52% sobre'l 2008.
  
Pasóse de 343 canales sacrificaes certificaes n'ecolóxico nel 2008 a 518 a últimos del 2009, lo que representa un aumentu del 50%. La media del 2008 foi de 29 canales por mes, mientres que la del 2009 foi de 47, conformando un aumentu del 60%. La media de kilos al mes nel 2008 yera de 7.000, mientres que nel 2009 algamó los 10.700, y el númberu de ganaderos n'ecolóxico aumentó un 7%, pasando de 155 a 166. Los productores de carne de vacunu representen el 57% de los productores n'ecolóxico n'Asturies.  
 
Cultivos
  
No que cinca a cultivos, el conseyeru destacó que se pasó de les 10,89 hectárees de superficie de cereal ecolóxico a les 44,60 pol aumentu del cultivu ecolóxicu d'escanda, que representa'l 90%.
  
Nel apartáu de frutales, destacó la fuerte presencia de la manzana de sidra. Señaló tamién les más de 6.000 colmenes d'apicultura ecolóxica y l'aumentu del 20% de les hectárees de pastos n'ecolóxico, hasta algamar los 13.700.
  
Pa Martín, estos datos suponen una "meyora del sector agroganaderu", y son "una garantía de calidá y la meyor manera de contribuyir a caltener un sistema de producción d'alimentos sanos, sostenibles y de máxima calidá".
  
Destacó tamién qu'estos datos muestren que "hai un avance nun contestu de crisis económica", lo que demuestra que l'agricultura ecolóxica, a xuicu del conseyeru, ta resistiendo la situación, gracies, en parte, a un "segmentu de población que quier comprar estos productos".
  
Asina, recordó que la potenciación d'esti tipu d'agricultura ye ún de los puntos incluyíos nel acuerdu de Gobiernu ente FSA y IU-BA-Verdes, coalición a la que Martín pertenez, y nesti sen anunció yá la preparación d'un nuevu 'Plan de Producción Ecolóxica 2010' que conllevará "unes llinies d'actuación más pragmátiques pa correxir les deficiencies y garantizar el puxu a esta producción".
 
Nun ye una marca de calidá
  
Pela so parte, el presidente del Copae mostró'l so deséu de que la población dexe de ver la producción ecolóxica "como una marca de calidá, y la vea como una alternativa que beneficiará a la naturaleza y al mediu ambiente". Recordó nesti puntu, que les formes actuales d'esplotación agraria y ganadera conlleven "contaminación, espilfarru y perda de recursos", sólo por "la busca del benefiu rápidu".
  
Entrugáu poles principales torgues a les que s'enfrenten, destacó la "salida al mercáu" de dalgunos productos pola "falta de sensibilización". Asina, señaló casos como'l de la sidra de mazana ecolóxico, que "tien una calida reconocida y ye ún de los sectores con más dificultes pa vender la so producción".
  
Nesti sen, Martín anunció que'l Gobiernu yá ta ultimando campañes de sensibilización que se desarrollarán conxuntamente con dalgunos conceyos.