Caamaño; "Nun se debe tratar igual a les llingües oficiales qu'al inglés"

El Ministru de Xusticia dixo que'l borrador del decretu del gallegu na enseñanza "nun pue tratar igual" a dos llingües oficiales qu'a un idioma estranxeru, al tiempu qu'alvirtió que "nun se deben alterar n'escesu" consensos llingüísticos que, como en Galicia, funcionaron "razonablemente bien".

Francisco Caamaño refirióse asina, en rueda prensa en Santiago, a la propuesta de la Xunta de dividir en tres tercios les hores llectives, ún pal gallegu, otru pal castellán y l'últimu, pa una llingua estranxera. Tres calcar en que "nun pue crease un estatutu pal inglés", pidió a la Xunta buscar  una "fórmula consensuada", qu'incluya idiomes foriatos nos currículos escolares.
 
Convencíu de que "hai marxes evidentes" pa establecer un nuevu repartu llingüísticu dientro del sistema educativu, pidió "volver al modelu apoyáu pol Tribunal Constitucional nos años 80, que valió pa desarrollar polítiques de defensa y lleis de normalización del gallegu y qu'aplicaron "tolos presidentes, con mayor o menor intensidá, pero sin facer de la llingua un problema de discriminación".
  
Nesti puntu, el titular de Xusticia recomendó al presidente del Gobiernu gallegu, Alberto Núñez Feijóo, que "piense nes consecuencies d'esti nuevu billingüismu" y que tome en consideranza "la llamada d'atención" de la sociedá, tanto al traviés de les distintes manifestaciones como del "día a día" de les instituciones culturales. "Porque nun pue crease un problema onde nun lu hai", sentenció.
 
Como presidente del PSdeG na provincia d'A Coruña, Caamaño garantizó al Executivu gallegu'l "apoyu" del so partíu na busca de consensu. "Tenemos voluntá de llograr acuerdos", aseguró. Esti estremu confirmólu'l secretariu xeneral del PSdeG, Manuel Vázquez, qu'aseguró que los socialistes sentaránse "mañana mesmu" em casu de que los llamen al diálogu.
 
Sicasí, dexó claro qu'esti acuerdu nun se basará "nun elementu de confrontación", como ye la propuesta de la Xunta, sinón qu'habrá que buscar "una fórmula distinta". "Pongamos el contador a cero", ofreció'l cabezaleru del PSdeG, convencíu de que "toa Galicia ta diciendo que nun-y presta'l nuevu decretu" y de que'l PP "nun tien potestá pa imponelu".