La Navidá

Equí tamos, col pruyimientu d'un feliz y perdichosu añu pa tóos. Atrás queden les fiestes navideñes que pueden gustanos más o menos, pero raro será que no les hayamos celebrao. Como se vien faciendo, con mudancies, fai casi 2000 años.

La Nuechebuena clásica n'Asturies, la del llar onde chisporroteaben los troncos de lleña y la ilesia onde se celebraba la tradicional misa del gallu, a veces con gaita y delles veces cantada, yera y sigue siendo en cierta midía, la de los pueblos. La creencia dicía qu'en tal nueche fracasaben toles bruxeríes. En dalgunos sitios (Balmonte, Tineu, Valle'l Nalón, Llanes ) entovía nesti sieglu que agora termina, arráncabénse tres pelos y arroxabénse al camín entantu se recitaba una llarga letanía que con variantes solía empezar asina : "Bruxes, diaños, a esconder, que nació'l Neñu en Belén..."

Les cenes asturianes de Nuechebuena, yeren bien cencielles. La sopa de llechi d'almendra yera'l platu clásicu d'entrada, siguío de besugu, merluza, chicharru o bacalao, si había mar pa ello, sinón pescao seco , y de postre... el casu ye que l'asturianu ye un pueblu muy llambión. El capítulu de dulces ye'l cuentu de nunca acabar: compota de peres, castañes y ablanes con miel (los turrones no tan presentes hasta bien entráu el sieglu), casadielles, escaldáu, compota de sidra y quesu d'almendra.

Dempués de la cena salíase pa la misa'l gallu: la nieve, la ventisca y la lluvia nun yeren frenu. En dalgunes parroquies llevábase inclusu un gallu pa cantar la Bona Nueva.

A fines d'añu salíen pelos pueblos los aguilanderos, que son grupos de mozos o moces que visitaben les cases cantando y pidiendo comida col fin de celebrar dempués una folixa. Yeren tamién famoses les comparses de mozos solteros, que recorríen los pueblos disfrazaos de mélicu, boticariu, galán, dama, maragatu, filadora, ciegu con lazarillu u osu. Había 2 clases de comparses: unes llevaben a cabu representaciones teatrales (Llaviana, Sieru, Bimenes, Llena) y otres no realizaben nengún tipu de representación, anque si recitaben coples y lletres satíriques y alusives a la Navidá, los Reis Magos, etc (Ibias, Allande, Salas, Quirós). Diben acompañaos polos guirrios, vexigueros o zamarrones, que son homes encapuchaos con un caperuzu de piel d'oveya, tou cubiertu de trapos, y que lleven colgaes grandes tosquiles y cascabeles. Siempre porten un palu llargu y fuerte col que dan grandes saltos y salven muries y tapies mientres asusten los neños, plizquen les muyeres y escorren los mozos que nun tan nel cortexu.

Agora que les fiestes ya nun tienen que ver col ciclu estacional, sinón con que haya moces y mozos nel pueblu pa calteneles, ún de los aguilandos que perdura nel tiempu, quiciabes como yera fai mil años, ye'l de San Xuan de Beleño.

Guei, ye bien distinto. Ciudades y villes compiten por recibir la Navidá con derroche de llume y soníu. A les bombilles de colores súmense los altavoces pela calle glayando villancicos y les tiendes compiten por tener los escaparates engalanaos. Fai ya más d'un mes que la tan anunciando los grandes almacenes, y la xente anicia a comprar el pixín a primeros de mes, que por estes feches hai grandes subes.

La llotería marca l'entamu. El día 22 de diciembre conviértese nel día la salú.. que tol mundu se deseya a falta d'otra suerte. Los neños de San Ildefonsu entren nes cases asturianes, y el suañu ye'l mismu pa toos ...un plizquín nun fae nengun mal a naide. Les cases adornense con árboles y belenes que mos falen de la globalización de los simbolos y l'amestadura de tradiciones.

La cena de Nuechebuena sigue reuniendo a les families na mesa aunque los menús suelen ser ya muy variaos, influencia de les miles de recetes y combinaciones que se ofrecen nestos días peles revistes y la televisión, y que son ayenes a la tradición. Los meses con erre son buenos pal mariscu y esti ye un de los pegollos fundamentales de les comides de Navidá.

El mariscu y los pescaos tan siempre presentes nos chigres y nes cases. Les cetárees nun dan abastu y facen nesti mes el so agostu. Tamién ye esta la temporada por excelencia del oriciu, del que somos los mayores consumidores d'España. En Xixón l'oriciu ye'l rei, y tien un llugar privilexiau nes sidreríes.

Abunden les comides de empresa, d'antiguos amigos.. ye'l momentu de recuperar los collacios y parientes que tan fuera, de tomar una sidrina y facer alcordanza del tiempu pasáu de la que se brinda pol nuevu.

La sidre xampanao, dulce y gasificao, ye'l cava asturianu y consúmese más cada vegada, amás de ser un produtu punteru na exportación, destináu a múltiples países que van dende Arabia Saudita a Iberoamerica.

Tamién cambiaron otres costumes. A los Reis Magos de toa la vida, xúntense agora Santa Claus y Papa Nöel, qu'aporten los regalos na Nuechebuena, lo que da a los neños más tiempu pa xugar y que ye un vezu bastante estendíu, sin llegar a desbancar a les sos maxestades Melchor, Gaspar y Baltasar. Nun hai pueblu ensin cabalgata: los Reis lleguen a tolos llaos en barcu, camellu , burru, carroza o xarré. Y tolos años aumenten les campañes de recoyía y distribución de xuguetes col enfotu de caltener la illusión de tóos y ca un de los rapacinos, más alla del poder aquisitivu de los pás.

Una vegada acabaes les Navidaes, les Comadres y L'Antroxu cerrarán el ciclu de les fiestes d'Inviernu. Tai atentos a esa hestoria, que contaremosla el mes que vien.

Pilar Sánchez Vicente