L'arzobispu d'Uviéu apoya a Munilla

L'arbobispu electu d'Uviéu, Jesús Sanz Montes, apoya al obispu de San Sebastián, José Ignacio Munilla, y deféndelu d'una "minoría" del aparatu políticu y clerical que concibe la Ilesia como "nun ye", al traviés d'una carta abierta na publicación relixosa 'Esta hora'.

Sanz Montes señala que "como tantes veces pasa, a esti cura y dempués obispu saludábalu con enorme la mayoría del pueblu de Dios cenciello y fiel, y difamólu la minoría del aparatu políticu y clerical que demientres munchu tiempu concibiere a la Ilesia tal y como nun ye, rompiendo cola tradición d'un pueblu particularmente relixosu y eclesial".
  
L'arzobispu electu d'Uviéu entama'l so escritu esplicando que "nun ye la solidaridá corporativa" lo que lu mueve a escribir esta carta, sinón "una comunión verdaderamente fraterna", que manifestó na discreción y qu'agora quier dicir "en voz alta". Asina, señala que fueron munches les persones que vieron como un "escesu descomanáu" lo "escenificao en ciertos ambientes" ante'l nomamientu de Munilla como nuevu obispu de San Sebastián.
  
Poro, recordando que se conocen dende'l seminariu en Toledo, destaca'l so trabayu como párrocu en Zumárraga, que lu fizo famosu "non pola proximidá o llonxanza a los postulaos políticos d'ún o otru signu, sinón por anunciar a Xesucristo, por apaecer como fiel fíu de la Ilesia Católica". "Esta identidá cristiana nun yera reaicionaria, nin belixerante, nin politiquera. Yera cenciellamente eclesial", añade.  
  
Amás, Sanz Montes afirma que "los que practicaben la hostilidá hacia la Ilesia teníen enfrente a esti sacerdote mozu de sólides convicciones y de fondera espiritualidá". De la mesma manera, apunta que "los que dientro de la Ilesia calteníen ambigüedaes o clares disidencies nel campu litúrxicu, sacramental, pastoral o teolóxicu (y habíalos en tolos estamentos sin escluyir nengún), teníen tamién enfrente a José Ignacio Munilla".
 
Por qué molesta
  
Poro, l'arzobispu electu d'Uviéu entrúgase na carta por qué yera "molestu" "¿Tenía un zulu d'inquisición, organizaba querrilles  pastorales o entrenaba terroristes d'incensariu? El que tratare con él, el que lu escuhare, sabe que nun ye asina", diz Sanz. De la mesma manera afirma que Munilla "nun tien más llinia pastoral que la de la Ilesia".
  
"Podemos equivocamos, en dalgún momentu nun llegar o trespasar la llinia roxa, pues la nuesa humana condición da pa eso y muncho más. Por eso pidimos perdón cada día na misa, y les veces que faiga falta. Pero nun mos presta que pongan nos nuesos llabios lo qu'enxamás diximos, o que digan que firmamos lo que nunca escribimos", defende Sanz Montes.
  
A lo último, l'arzobispu electu d'Uviéu, apunta que puen ser "el pim-pam-pum de turnu, dientro y fuera de la Ilesia", cuando a dalguién nun-y presta lo que sí dicen y afirmen; y hasta crear "malestar" cuando dalguién s'empeña n'escuchar d'ellos lo que Dios y la Ilesia "nun quier dicir" al traviés de los sos llabios.
  
"La tentación entós ye callar o falar de llugares comunes y piadosos, pero'l Señor mos da la gracia de la fuerza sin facemos prepotentes, la gracia de la firmeza sin cayer na dureza, la gracia de la ternura misericordiosa sin cayer nel sentimentalismu", indica Sanz Montes, qu'acaba afirmando que "a San Sebastián llega un mozu y un gran obispu".