La derecha recupera'l poder en Chile

El candidatu opositor de dreches Sebastián Piñera algamó la victoria na segunda vuelta de les eleiciones chilenes, con un 51,6 por cientu de los sufraxos nel 99,2 por cientu de les meses electorales escrutaes.

Piñera, que destacó que Chile demostró ser una democracia "sólida y madura" y que l'alternancia política foi "pacífica y exemplar", venció al candidatu del Gobiernu, Eduardo Frei, qu'algamó'l 48,3 por cientu de los sufraxos.
  
Será'l primer xefe del Executivu conservador que gobierne Chile en mediu sieglu, y amás acaba cola hexemonía política de la Concertación, el bloque de centru-izquierda, que se caltuviere nel poder en Chile demientres los últimos 20 años.
  
"Dimos una vez más un exemplu d'una democracia sólida, madura, que ye a tener una eleición, hasta alternancia nel gobiernu na forma pacífica y exemplar", dixo Piñera a la presidenta chilena, Michelle Bachelet, que lu llamó pa felicitalu.
  
Cientos de partidarios del candidatu, un empresariu d'ésitu con una fortuna estimada pola revista Forbes en 1.000 millones de dólares, salieron a celebrarlo nes cais de Santiago, especialmente nos barrios más acomodaos de la capital.
  
Piñera, de 60 años, plantegó demientres la campaña eleutoral un aumentu de los incentivos al sector priváu pa entainar la recuperación económica tres la recesión y baxar el paru. Estes posiciones favorables a la empresa privada, sicasí, provocáron-y antipatíes ente los sindicatos y obligáronlu a gobernar con un Congresu mui dividíu.
 
El virtual vencedor de les eleiciones sumaráse a los presidentes del centru derecha de México, Colombia y Perú, que yá marcaron distancies col presidente venezolanu, Hugo Chávez, y el bloque de gobiernos d'izquierda sudamericanos.
 
Apuesta pola unidá
  
Sebastián Piñera díxo-y al so rival eleutoral, el candidatu de centru izquierda Eduardo Frei, que lo que precisa'l país "güei más que nunca" ye "unidá". Piñera manifestó-y estes palabres a Frei cuando ésti foi a visitar pa felicitalu. "Quiero dici-y que'l nuesu país necesita güei más que nunca unidá (...) quiero darréu acoyer y revivir lo que foi la democracia de los acuerdos", afirmó Piñera.
  
Pela so parte, Frei tuvo palabres de reconocencia pa Piñera. "Güei demostróse la cultura del nuesu pueblu (...) deséo-y éxitu al nuevu presidente, nosotros vamos tar nuna oposición constructiva", manifestó en declaraciones recoyíes pol diariu chilenu 'La Tercera'.
  
Piñera, amás, mostró'l so convencimientu de que va tener una oposición "llegal" y "constructiva" y afirmó que, pese a que foi una campaña dura, la Concertación, el partíu de Frei, caltuvo una "actitú de nobleza".