L'Audiencia Nacional almite'l recursu contra González-Sinde

L'Asociación acaba asina la vía alministrativa y entamu un nuevu procesu, agora nos tribunales de xusticia, qu'esperen que "prospere" antes de que la titular de Cultura "yá nun sía ministra, pues el recursu tendrá perdíu'l so oxetivu, el Gobiernu ganará y l'Asociación d'Internates perderá", señala'l comunicáu.
  
L'AI presentó'l 3 de xuneru del 2009 énte la Oficina de Conflictu d'Intereses una denuncia contra González-Sinde por entender qu'existía una situación de conflictu d'intereses priváu col cargu, "y que lloñe de desabrise como ye preceptivo, según apaez publicao nel BOE, dispunxo delles ayudes a la industria cinematográfica, por un valor total d'ocho millones d'euros. Dempués, la denuncia amplióse hasta dos ocasiones por caltener dicha acitú", señala l'AI.
  
Los internautes recuerden que'l pasáu 28 de xunetu, "la Oficina del Conflictu d'Intereses refugó dafechu la denuncia, que facía papel moyáu les promeses del presidente del Gobiernu, José Luis Rodríguez Zapatero, cuando nel primer añu de llexislatura adoptó una serie de midíes tendentes a la proclamación de los principios que debíen rexir les actuaciones del Gobiernu, principios que nun sólo debíen de ser éticos sinón xurídicamente exixibles".
  
L'AI apunta que'l Conseyu de Ministros, nel so conceyu de 18 de febreru del 2005, adoptó un Acuerdu pol que s'aprobaba'l Códigu de Bon Gobiernu de los miembros del Executivu, y de los altos cargos de l'Alministración Xeneral del Estáu, que define lo que debe entendese por conflictu d'intereses diciendo qu'ésti existe "cuando los altos cargos intervienen nes decisiones rellacionaes con asuntos nos que coincidan al empar intereses del so puestu públicu y intereses privaos propios, de familiares direutos o intereses compartíos con terceres persones".
  
L'AI recuerda tamién que l'oxetu de la so denuncia ye "la existencia d'una situación de conflictu que pon en riesgu la imparcialidá de l'actual ministra de Cultura, y poro, tien la obligación de desabrise", y esclara que "en nengún casu" afirmen que "realizare actos en beneficiu propiu, o de los sos parientes". "Si asina fuere taríamos nun supuestu polo menos de prevaricación, de tráficu d'influencies o de corrupción, dalgo qu'escede l'ámbitu de la presente denuncia y correspuende a la Sala II del Tribunal Supremu", añade.
  
"La condena, anque sía moral, pue tener un valor edificante y rexenerador de la vida pública pa los munchos que creemos nel bon Gobiernu frente a los pocos, que cola so charranería y los sos escesos, pretenden aniquilalu", acaba l'AI.