Ecoloxistes persónense nes suxerencies del Parque eólicu de Corondeño

La Coordinadora Ecoloxista d'Asturies personó nel trámite de suxerencies del Parque eólicu de Corondeño nel conceyu d'Allande, onde van instalase ocho molinos de 2 Mw de 78 metros d'altor y 80 metros de rotor, según informaron los ecoloxistes nuna nota prensa.

Nel conceyu que yá tán funcionando'l del Sierra de Lagos con 59 molinos, ta na construcción el de Carondio con 25, y hai otru en trámite en Campo Ordial, amás d'esti Corondeño.
  
Esti parque eólicu ye ún de los 88 parques previstos nel occidente asturianu. Colo cual, según los ecoloxistes, l'impactu de toos ellos tien un efectu "acumulativu", onde hai que sumar los efectos de les llinies d'evacuación y les subestaciones eléctriques, polo qu'entienden qu'esti conxuntu precisa sometese a la Evaluación d'Impactu Estructural.
  
La coordinadora caltién que va afectar a abondos núcleos de población por proximidá: Corondeño, Lago, Castello y Penouta. Poro, resulta evidente que tou esti conxuntu de parques debería sometese a una evaluación completa d'acordies a la Llei 9/2006, de 28 d'abril, sobre evaluación de los efectos determinaos planes y programes nel mediu ambiente.