Etnoecoloxía de les Poblaciones Vaqueires

Les poblaciones vaqueires tán distribuyíes per tol mundiu, y el so mou de vida ye la carauterística que los define.
Constitúi una perfeuta adautación ecolóxica al mediu afitada polos sieglos d´esperiencia que dengún axente esóxenu habríe d´esqaniciar, como acaez n´abondos estaos africanos.
El casu asturianu ye´l caberu pasu dica la desintegración étnica. La sobrevivencia d´estes menes d´aprovechamientu másimu de los recursos qu´ufierten los ecosistemes concretos onde s´asitien les poblaciones vaqueires ya la so integración nellos ye un llogru etnoecolóxicu de primer orde na diversidá de soluciones vitales n´ambientes duros, que merez una mayor atención y estudiu.

Les poblaciones vaquieres defínense pola triba d´esplotacion del mediu, y comprenden munches races y cultures, que treshumen ente dos llugares establecíos dependiendo´l momentu láñu. Níviernu ocuparán una fastera y en branu otra. Cuasi nun hai poblaciones vaqueires que dependan esclusívamente del so ganao polo que han de alternar el pastoréu colos llabores agrícoles y en menor proporción diverses tribes de mercadéu, nel casu asturianu quincallería, buhonería y tresporte.
La estensión y adautación al mediu que presenten les numberoses poblaciones vaqueires del planeta amuesen una llarga esperiencia ya integración colos ciclos naturales, y tol acervu biolóxicu y cultural qu´arreya, ampliando la diversidá de la nuesa especie, qu´amenorgaríe si se fina con estes menes de vida.
L´exemplu de los Vaqueiros d´Alzada ye´l más prósimu y los estudios al respetutu foron demientres llargu tiempu controvertíos y poco empobinaos al aspeutu de la so ecoloxía, campu nel que habría d´´ afondase nun futuru p´abordar cualesquier estudiu d´una población vaqueira, yá que ye un fautor cimeru a la hora de definir esos grupos.
Esaniciaos dogmes so los oríxenes estremaos de los vaqueiros, sí hai de decatase del valir de la identidá étnica pa la sobrevivencia d´estes comunidaes, onde les variables culturales xueguen un papel básicu, incluyida la llingua propia, non solo como elementu funcional sinón como símbolu más notoriu de la coleutividá que se cinque.
Los cambeos que tán produciéndose nos moos de vida vaqueiros, como´l casu asturianu, que sedríe pioneru de munchos otros, indiquen una integración nos sistemes de producción rexonales, saliendo asina de la dixebra funcional grupal. Esto en dellos casos pue ser un condicionante perfuerte, como lo ye la integración d´Asturies na Xunión Europea, coles restriciones qu´arreya pal seutor ganaderu. Estudios de la influyencia nes estructures vaqueires, sedríen necesarios y afayadizos.
Nun dexa de sorprender que seya precísamente agora que se desintegra esti coleutivu cuandu entama una cierta almiranción ya interés n´el por parte d´una comunidá, Asturies, que tradicionalmente apreció-yos poco.

IDENTIDÁ ÉTNICA
Si nun pue definise l´espaciu poles rellaciones billaterales ente l ´home y los datos ñaturales, ésti taqmpocu nun ye´l resultáu esclusivu de l´aición ed los fluxos económicos, como si les superficies foren campu dáición de fuercies modeladores que nun se decantaren nos sos engurriaos aletores y fuexes fonderes. d´esti mou, l´envís xeográficu nun tien de basase namái nel principiu de llocalización, sinón amás tamién nos ecosistemes, xeitos especiales que llenden arties determinaes, (Santos, 1990).
Amás d´esta influyencia, los camientos, sentimientos ya aiciones dún pueblu puen barruntase na mayoría les vegaes pola mor de la so afiliación tribal y la mena sosistencia. Asina los individuos adouten una frasca d áctitúes y valires afayadizos pal so ambiente.
Les actividaes vaqueires ya´l mou de vida formáu per aciu d´elles nun son resultáu obligáu pol determín del mediu. La estratexa grupal nun solo ta condicionada polos llendes del mediu, sinón amás tamién pol desendolque de les tribhes d´interaiciones dables y la escoyeta de la más favoratible. Entós, la estremaú xenérase na propia interaición; nun ye que primero´l mediu faiga un grupu humanu y a posteriori interacione colos demás.
Esti fautor fai que nun se dea homoxeneidá cultural inclusu nun mesmo país, como nel casu asturianu. L´importancia de los procesos hestóricos nes etnicidaes, perpasa al determinismu ecolóxicu. Falaríese d´una "ecoloxía simbólica" d´identiaes estremaes,(Contreras,1991).
Los sistemes de clasificación coleutivos han pescanciase nel contestu ecolóxicu y económicu nel que s´atopen, y tan rellacionaos cola ambivalencia de los asuntos humanos. Esto iguará un conxuntu creyencies importantes que son a xenerar conductes qu'afeuten al grupu.

LLINGUA Y VAQUEIROS
Abondos autores afiten que'l cribu los signos ye absolutamente cimeru pa una participación nel marcu social, en tolos animales, incluyíu l'home. Poro, p'algamar la güeyada interior d'una cultura ye necesario conocer los sos signos mesmo qú un nativu. Y la llingua ye'l cimeru d'ellos, en xeneral.
Les idegues qu'un llinguaxe pue espresar dependen abondo de los intereses de les sociedaes que los desendolquen y les sos necesidaes. Y toa llingua ye un estensu sistema de riegles, estremaes del restu, nel que tán culturalmente ordenaes les formes y categoríes coles que la personalidá, amás de comunicase, caltria la natura, alvierte ó ignora determinaes tribes de rellaciones y fenómenos, encanaliza les sos xides y construye la casa de la so conciencia. A lo menos asina ye sopelexáu por Harris, M.
D'esta miente, alcuéntrase na mayoría les poblaciones vaqueires del mundiu un xeitu cultural común como ye'l caltenimientu non solo de modus vivendi y formes de trabayu estremaos de los sos vecinos, sinón tamién llingües estremaes. Poro, los tuvinxi, na Siberia'l meridión caltienen un idioma emparentáu col turcu, los yacutos una llingua del Baikal, los fulani del Sudán l'idioma fufulda, ca grupu d'Afganistán un idioma estremáu (persa, curdu, indiu, durrani y xilsani).

ADAUTACIONES AL MEDIU FÍSICU
Cuasi tolos pueblos agricultores críen dalgún tipu de ganadería como actividá económica secundaria. El caltenimientu de rebañaos numberosos dase nos pastos ñaturales, onde'I ritmu estacional ye mui marcáu. En xeneral, cuntando l'allugamientu l'agua, les meyores fasteres son nes que por altores estremaos o otres causes esisten pastos estacionales alterniegos, como pastos de branu nes montañes y d'iviernu nes llanaes prósimes. Ello implica'l desplazamientu'l ganao y los ganaderos de mou regular, estremándose asina los vaqueiros de los nómades, que migren de contino.
En delles fasteres, esta adautación per estaciones ye l'únicu sistema d'esplotación racional. Por exemplu nes faces d'ermu, la migración norte-sur según el lloviu torga´l sopastoréu.
Daqué asemeyao asocede nos. Cárpatos dende los pastos baxos a los altos. Trátase d'una adautación a los llovios estacionales nos climes semiescariaos. Pa enriba, la especialización ye pereficaz, porque'l ganao ye mui adautativo, relativamente poco suxeto a cambeos climáticos y pue reproducise a sigo mesmo. Too fai que seya meyor nesos ambientes que l'alternativa agrícola.
El ganao dondo permitió l'adoución d´una triba de pastoréu determinada y la colonización d'hábitats dica entós namái pa cazadores. En xeneral, pue dicise qú alrodiu'l 60 per cientu los pastos nun son afayadizos pa la llabranza.
Otru fautor d'importancia ye la posibilidá de tresporte. Asina como un meyor balance d'aminoácidos na dieta con carne. Y la esbilla d'animales adautaos a los sos alimentos.
Nun hai d'escaecese que'l ganao bovín ye'I qu´ufier ta un másimu na variedá d'usos, seyendo amás fonte de materies primes: carretada, tracción, pelleyes, sangre, lleche, güesos, cuchu, pero menos adautatible qu´oveyes y cabres, con más querencia d'agua y más seleutivo na so alimentación. Les estremaes poblaciones vaqueires escoyerán ente estes dos víes dependiendo de los recursos qu'ufra el so mediu ambiente.

LOS VAQUEIROS D'AFRICA
A mou d'exemplu de la estensión, diversidá y futuru de les poblaciones vaqueires non europees tenemos el casu d'Africa.
Nesti continente son yá alrodiu de 10.000 años lo que va de rellación simbiótica ente los pueblos y el so ganao, colo que tien d'entramáu de biocomportamientu, seyendo una importantísima amuesa de la diversidá cultural y biolóxica del Homo sapiens.
Ente los atributos comportamentales más importantes, abulten:

 

*El territoriu de pastu: vien a ser un recursu públicu de la xunidá cultural que lo esplota. D'equí pue derivar al desplazamientu pola agricultura a "tierres marxinales" pa ella. Éstes, sedríen llugares de seques periódiques y grandes variaciones climátiques añales. Tamién resulten grandes aries de tierra pola mor de la baxa ya impredecible productividá biótica del mediu ambiente. Los ciclos d'estrés añal nutricional deprendieren a los vaqueiros a movese a distancia pa masimizar los recursos disponibles.

*Movilidá: basada nes feches de lluvia, que condicionen la capacidá de carga biótica a caltener.

*Demografía d'homes y ganao: les vaques, cabres, oveyes, burros y camellos tienen un control poblacional illimitáu dependiente de les condiciones ambientales, mentantu que los homes non. La masimización del númberu d'humanos respuende a la rápida tasa de recuperación del ganao.

Comparatívamente, en xeneral pue dicise que les poblaciones vaqueires d'Africa son menos fértiles que los sos vecinos sedentarios.

FUTURU CAMBIANTE
El mou de sosistencia d'estes poblaciones, comparáu coles agrícoles, ye de menos productividá y caru en términos de los recursos de tierra precisaos. Pero tamién ye perefeutivu pa esplotar les tierres ermes y semiermes, qu'ocupen una gran parte'1 continente.
La tendencia de los gobiernos d'Africa anguañu ye a la imposición de la sedentarización de los vaqueiros, que la refuguen. Supónse que tolos cambeos na sosistencia y l'estilu vida son como imponer estrés a la población afeutada, porque les poblaciones que caltuvieron un patrón de sosistencia demientres abondu tiempu tienen afitao comportamientos biolóxicos y adautaciones culturales nel so contestu mediu ambiental; poro, les variaciones sedríen frayadures con efeuto imprevisibles na so salú y adautabilidá.

LOS VAQUEIROS D'ALZADA D'ASTURIES UN MODELU

 

*Localización
Los vaqueiros asitiáronse nes llocalidaes de mayor altor p'aprovechar los sos pastos de primavera, branu y seronda. Hai una gran estensión de monte comunal que s'usa como pastu pa vaques y caballos, y pa terazar fayes, urces y xiniestes, pa lleña y teitos.
La cantidá y calidá del pastu ye duple que nos valles pol suelu caliar y surde más sero. Siégase más ceo que nos llugares d'iviernu, resultando más xugosos.

*La "casa vaqueira"
Ye la xunidá de residencia, producción y consumu del grupu domésticu. Comprende: vivienda, corte, payar, fornu, finques, ganao, animales de corral, preseos, maquinaria agrícola, cacía y el drechu d'aprovechamientu de pastos, lleña y madera nos montes comunales (Sánchez Fernández,1988).
El grupu domésticu mayoritariu ye trixeneracional y el tueru perpetúalu el fíu herederu de la tercer xeneración.

*Circuitu económicu d'anguañu
Hai una tendencia ñidia a la inserción total de la producción vaqueira nos circuitos de distribución y consumu asturianos y estatales.
Abandónase la producción d'autoconsumu ya intensifícase la cría de ganao vacuno ensin que s'especialice la casa vaqueira en carne o lleche. Fina l'arriería y les tierres de cultivu d'antañu dedicáronse a producir forrax pa caltener el xorrecimientu de cabeces de ganao. D'esti mou, güei han alquirise nel esterior los alimentos ellaboraos de cereales y pataques.

*Estratexa
Una amuesa de movilidá intragrupal a la gueta la meyor estratexa productiva atópase na variabilidá a la hora de destinar la producción ente lo tradicional, carne, y lo moderno, lleche.
Na escoyeta inflúin dos fautores ecolóxicos: el relieve'l tarrén y la distancia física de l'aldega a los pastos comunales.
Los grupos domésticos dedicaos a ganao de carne seleicionen la vaca roxa o carreña, que s'adauta bien al altor y soporta tanto'l fríu como la calor braniega, seyendo más rústiques y compautes, "del país".
Nel casu opuestu, pa lleche, la ratina, con rique munchu calciu y magnesiu, presentes nos suelos caliares.
Les variaciones son les siguientes:

oCría de ganao de carne y lleche a partes netes.

oCrucie de roxo y ratín pa sumar producciones.

oNon especialización esclusiva.

oVariación de la estratexa nel tiempu dependiendo de variables d'ámbetu llocal, rexonal, imposiciones europees, malures vacunes, cambeos de los precios, númberu la familia, etc.

Los oxetivos que se gueten na roxa son:
Xatos culonos: altu rendiminetu de la canal, alrodiu d'un 63% del vivu. Unos 100 kilos más que nes ratines , que na canal supón unos 45 kilos más. Ye de güesu más llixeru y la so carne tien menos infiltración grasa, con collor y tastu más apreciaos en mercáu. Viven más años y paren más críes.
L'oxetivu que se gueta na ratina ye:
Da'l duple de lleche nel duple meses per añu que la roxa.
Los principios decisorios na escoyeta de la estratexa ganadera a siguir son el porgüeyu a llargu plazu, la disposición de perres a curtiu plazu, el riesgu y el tiempu de trabayu.
El ganao de lleche de les dos primeres xides, amenorga'l riesgu y aumenta'l tiempu de trabayu.
El ganao de carne arreya menos esfuerciu de pro ducción y más porgüeyu dependiendo del númberu de críes culones, poro, xorrez el riesgu y dispónse de menos perres inmediates.
Dellos tenten d'algamar les ventaxes de dambos los dos combinándolos.
El condicionamientu social ye'l tamañu y composición del grupu familiar qu´incide na fuercia trabayu.

* Clima
El clima asturianu ye templáu-húmedu con munches precipitaciones tol añu y humedanza rellativa alta, ensin temperatures estremes y con muncha nubosidá. Esto aumenta nes montañes onde ñeva más. Malpenes hai meses secos nelles, onde hai más pastos y menos cultivos.
La ecoloxía concreta condiciona la organización en praos de gadañu, de riegu y secanu y d'otra banda pastos con muncha yerba de mayu a ochobre.
Cultívase pataca y faba prieto xunta trigu y centén faltando´l maízu pola falta d'agua.
Nos pueblos d'iviernu el suelu determina, y les reducíes faces agrícoles y praos de gadañu pa yerba ensucho.

* Cadarma económica

1.Organización del espaciu y cadarma de la propiedá. Hai dos formes básiques:

o Zones averaes a les viviendes, al llau de regatos y nes faces más fértiles. Son les propiedaes familiares zarraes con muries. Empléguense pa cultivos o praos de gadaña y constitúin una mínima parte.

o Zones de pastu y monte baxo, cretes y de roques. Mancomunaos en propiedá proindivisu empobinaos a pastu, rozu y lleña. Asitiaos alrodiu los anteriores y alministraos pola Xunta Vecinal.
.

2 Ganadería, agricultura, arriería y traxinería.
Básicamente evolucionó fai trenta y munchos años pola mor del depoblamientu del campu. Enantes la media yera tener 7 vaques, 3-4 machos y caballos de carga,13 oveyes y 1 ó 2 gochos. Otru motor del cambéu foi la evolución de los medios de tresporte. Too ello fexo que los cultivos foren utilizaos de praeres, esaniciándose l'arriería y la traxinería, oveyes, caballos y mulos, y doblándose'l ganao vacuno.
El ganao llévase a los tarrenos comunales ochu meses al añu diendo a durmir a la corte solo al entamu y a la fin, lo que supón poco trabayu. Usábase la vecera, que yera curiar por turnos de ún o dos vecinos el ganao de toos.

* Treshumancia vaqueira
Ye'l desplazamientu periódicu biestacional de families y fasta pueblos enteros con tolos sos ganaos y preseos ente dos llugares o residencies fixes. Conxugaríe elementos propios y de la treshumancia al mesmu tiempu, (García Martínez,1988).
Estrémase del nomadismu en qu'ésti nun tien un puntu de residencia fixu; y de la treshumancia en qu'ésta nun implica'l movimientu de tola familia y tolos enseres.
El dualismu´l mou de vida vaqueiru afeuta a toles estayes de la so esistencia. Demientres ochu meses al añu vive nos pueblos d'arriba y los otros cuatru nos d'abaxu. Per Marzu dellos miembros de la familia xuben coles oveyes, cabres, dalgunes vaques y los potros. Van llimpiando los praos, el trigu serondo, los arbeyos, les pataques, etc. Los que queden en valle tan col ganao y semen dalgunes pataques pal mes de la yerba. N'Abril xuben colos demás animales y coses zarrando la casa d'abaxu. La persona más capaz diba delantre coles vaques y xatos zarrando la marcha'l pater familias colos machos y los neñinos. Avezaben dir families enteres xuntes. Yera una folixa pa ellos pero non pa los veci nos sedentarios de los pueblos pelos que pasaben. Yá enriba, n'Abril sellaben el trigu, la escanda les lenteyes y arbeyos. Llantábense berces, pataques, y trigu serondo, regábense los praos, mentantu'l ganao pastiaba nos praos comunales. Per Mayu abonábase, y sellábense les pataques. Dempués recoyíase la yerba. N'Agostu recoyíense'l trigu y les lenteyes, arbeyos y fabes, pal pote. En Setiembre sacábense les pataques y recoyíase'l trigu serondo, la lleña y la xaranzaina; facíase l'arriería y nel día la Santina díbase a la feria col ganao. En Payares baxábase col trigu temprano a los valles. Nel iviernu coraben los gochos, filábase, y traxinábase fasta Marzu.

* Arrieros, traxineros y comerciantes
Yeren actividaes principales dica fai pocos años pol porgüeyu algamáu. Recibíen en metálicu cuasi un terciu del porgüeyu añal. Asina facíen trueque con mercancíes que trayíen de Castiella col ganao de carga, col que tamién comerciaben dientru'I país, y facíen la treshumancia vaqueira. D'esti xeitu los caballos yeren pervaloratibles pa ellos.
La muyer tenía gran autonomía y munchu tiempu al añu tiraba ella sola pola casa.

* Rellaciones de parentescu. Estratexa matrimonial
Como afitare Fernández Pérez en 1991, el matrimoniu mayoritariu de los vaqueiros tenía l'envís de caltener y meyorar el patrimoniu familiar. Colo que sofitóse ceo la fechura de grupos domésticos vaqueiros.
Según l'estudiu "Los contratos matrimoniales nel conceyu Navia demientres los años 1775-1874", amuésase la estratexa d'esogamia xeográfica de distintos pueblos pero endogamia social intravaqueira con baxu índiz de matrimonios consanguíneos.
Ello potenciábase pol porgüeyu coles "meyores" y "dotes" nos contratos matrimoniales, y facía que xorreciera la solidaridá de grupu.
Cola meyora, el beneficiariu aprovechábase enantes de la partición del heriedu del terciu los bienes disponibles, al que podía sumase-y el quintu de llibre disposición.
El "dote" ye la propiedá que la muyer lleva pal matrimoniu en casu de nun ser ella la "meyorada". Sedríen diferencies cuantitatives significatives respeutu a los campesinos sedentarios.
D'esti mou fortalezse la sobrevivencia´l grupu y les sos propiedaes coleutives. Sedríe una mena de territo rialidá que refuercia les interrellaciones del grupu y torga, al mesmu tiempu, l'aniciu de grupos menores, fomentando la dixebra xeneral y la identidá étnica.
Ello supón un aspeutu más de l'adautación cultural a un mediu ambiente concretu y a espacios competíos.
Poro, la baxa na natalidá, la emigración y los cambeos socioeconómicos de fin de sieglu reflexaríense nel aumentu de matrimonios ente vaqueiros y non vaquieros nun contestu d'aculturación.

*La vivienda
Ta mui condicionada polos fautores ecolóxicos y económicos, y rellacionada cola organización social del grupu, basada na familia troncal de fasta tres xeneraciones y ensin divisiones de clas social dientru´l grupu, que comparte´l mesmu sistema socioeconómicu, (García Martínez,1.988).
Nos pueblos de branu y d'iviernu tienen cocina-habitación, corte y payar. La tipoloxía ta descrita en, (García Martínez,1.988).
Equí lo qu'abulta más ye l'usu de piedra, piornal y madera pa tol edificiu, materiales ufiertaos pol mediu; y la so función utilitaria p'aprovechar al másimu los recursos de mou adautáu al mediu físicu y social.

CONCLUSIONES
Les poblaciones vaqueires básense nel so sistema peculiar de treshumancia biestacional p'adautase al mediu y formar les sos identidaes étniques, que se realimenten ente sigo.
Un fautor cultural condicionante y poco estudiáu pue ser la variedá llingüística qu'empleguen.
En cuanto a les adautaciones al mediu físicu, la hipótesis de trabayu d'esti artículu ye que masimicen les posibilidaes del mediu natural nuna rellación simbiótica.
Los vaqueiros son grupos humanos d'amplia distribución mundial, ocupando siempre nichos ecolóxicos concretos.
El so mou de vida tan especializáu ye un modelu socioeconómicu integráu nos sos ecosistemes correspondientes, y anguañu amenazáu polos cambeos tendentes a la sedentarización que constitúin un fenómenu global.
Los vaqueiros d'alzada d'Asturies son l'exemplu más avanzáu d'aculturización, anque constitúin un modelu prósimu y representativu de toles poblaciones vaqueires.
Les respuestes a les variaciones del mediu, los so ritmos biolóxicos, entamen a carecer perturbacione disarmóniques que sedríe afayadizo estudiar. Asin como aspeutos concretos: ropa, entramáu ambienta fluxos d'enerxía, demografía, rellaciones con otros grL pos non vaqueiros, y aspeutos globales qu'integre toles variables de les estremaes comunidaes.
Xuan Porta Allende
Biólogu y Miembru'I Conceyu pol Estudiu y Proteición
de la Llingua Asturiana

BIBLIOGRAFIA
ADAMSON, E. WEAVER, T. (1985): Antropologia y experiencia humana Ed. Omega, Barcelona.
BARAGAÑO, R. (1977): Los vaqueiros de alzada. Ed. Ayalga.
BARING, A. (1981): "Los fulani de Sudán" (Pueblos de la Tierra, Tomo II, 24-33). Ed. Salvat, Barcelona.
CAMPBELL, B. (1988): Ecología humana. Ed. Salvat, Barcelona.
CÁTEDRA TOMÁS, M. (1972): "Notas sobre un pueblo marginado: los vaqueiros de alzada (Ecología de braña y aldea)", Revista de Estudios Sociales, vol 6:139-164.
CÁTEDRA TOMÁS, M. , SANMARTÍN. (1979): Vaqueiros y pescadores. Dos modos de vida. Ed. Akal, Madrid.
CÁTEDRA TOMÁS, M. (1989): La vida y el mundo de los vaqueiros de alzada. Centro de Investigaciones Sociológicas, Madrid.
CLOUDLEY-THOMPSON, J. L. (1987): EI hombre y la biología de las zonas áridas. Ed. Orbis, Barcelona.
COLSON, R.F. (1990): "Los vaqueiros. Brasil" (Pueblos de la Tierra, Tomo 10, 56-65). Ed. Salvat, Barcelona.
EDGERTON, (1965): Culture and Ecology of East Africa Project.
FEO PARRONDO, F. (1986): Los vaqueiros de alzada: Estudio geográfico de un grupo marginado. Uviéu.
FERNÁNDEZ PÉREZ, A. (1991): "La constitución de la sociedá familiar entre xaldos ya vaqueiros nel concechu de Navia a traviés de los contratos familiares" (1775-1874). Cultures vol 1:101-133.
GARCÍA, A. (1981): "El sistema de parentesco de los vaqueiros de alza- da en Asturias". BIDEA nº 105-106: 287-312.
GARCÍA, A. (1988): Los vaqueiros de alzada en Asturias. Principáu d'Asturies.
GARCÍA GARCÍA, J. L. (1991): "Los mundos de los vaqueiros". Cultures vol 4: 225-233.
GARCÍA MARTÍNEZ, A. (1988): Los vaqueiros de alzada de Asturias. Un estudio histórico-antropológico. Principáu d'Asturies.
GARCÍA MARTÍNEZ, A. (1990): "Grupos sociales marginados. Los vaqueiros de alzada de Asturias". (Historía de Asturias, cap 32, 557-576). Ed. Prensa Asturiana, Uviéu.
GEERTZ, C. (1988): La interpretación de las culturas. Ed. Gedisa, Barcelona.
GÓMEZ PELLÓN, E. (1996): "Asturias. Los grupos marginales: los vaqueiros de alzada". (Etnología de las Comunidades Autónomas:109-110). Ed. Doce Calles, CSIC, Madrid.
GÓMEZ TANBANERA J. M. (1.975): El vaqueira de alzada en el mundo de hoy. Uviéu.
GONZÁLEZ-QUEVEDO, R. (1.994): Antropolaxía Llingúistica. Academia de la Llingua Asturiana, Uviéu.
GONZÁLEZ-QUEVEDO, R. (1.996): "Los vaqueiros d'alzada según Bernardo Acevedo". Cultures vol 6: 43-59.
HARRIS, M. (1991): Introducción a la Antropología General. Ed. Alianza Universidad, Madrid.
LINETON, P. J. (1.991): "Los Tuvintsi" (Los Pueblos de la Tierra, vol 15: 54-57). Ed. Salvat, Barcelona.
LITTLE, M. A. (1.989): "Human Biology of African Pastoralist". Year Book of Physical Anthropology, vil 32: 215-247.
MORAN, E. F. (1.982): Human Adaptability. Ed. Westview Press, EUA.
ORLOVE, B. (1.980): "Ecological Anthropology". Annual Review of Anthropology, vol 9: 235-273.
PORTA, X. (1.995): "Vaqueiros d'alzada: adautaciones etnoecolóxiques". EI Canciu'l Cuélebre vol 1: 6-7.
PRAT, P., MARTÍNEZ, V., MORENO, Y. (1.991): Antropología de los Pueblos de España. Ed. Taurus Universitaria, Madrid.
SÁNCHEZ FERNÁNDEZ, J. O. (1,988): "Estrategias económicas entre los vaqueiros de alzada en el concejo de Somiedo, Asturias". BIDEA nº 125:189-213.
SANTOS, M. (1990): Por una Geografía nueva. Ed. Espasa-Calpe, Madrid
SIMMONS, I. G. (1.982): Biogeografia Natural y Cultural. Ed. Omega, Barcelona.
TAPPER, R. (1.991): "Los Pakthun nómadas" (Pueblos de la Tierra, vol 16: 76-87). Ed. Salvat, Barcelona.
URÍA RÍU, J. (1968): Los vaqueiros de alzada. Obra Social y Cultural de la Caja de Ahorros de Asturias, Uviéu.
VALDÉS, R. (1997): Las Artes de Subsistencia. Adara Ed., Madrid.