El grupu SOS alíase con Central Llechera Asturiana

|

SOS Corporación Alimentaria robló un acuerdu de collaboración estratéxica con Central Llechera Asturiana p'ampliar la so presencia na canal 'horeca' (hostelería, restauración y catering), al traviés de la rede de distribuciones independientes que la empresa llechera tien nel territoriu español.

Con esta alianza, el grupu presidíu por Mariano Pérez Claver apoyaráse na rede de distribuidores de la canal 'horeca' de Central Llechera Asturiana col oxetivu de comercializar progresivamente la so llinia de productos 'Profesional Hostelería', y diseñada y desarrollada esclusivamente pa esta canal, que representa sobre'l 30 por cientu del consumu de les categoríes d'aceite y arroz.
  
La collaboración pactada ente ambes empreses tamién recueye la puesta en marcha demientres esti primer trimestre del 2010 d'una batería d'aiciones de comunicación conxuntes, col oxetivu de reforzar la comercialización de los productos "cabezaleros" de SOS, como Carbonell y Koipesol Profesional Hostelería y de Central Llechera Asturiana.
  
El direutor xeneral de SOS España, Juan José Landazuri, destacó que se trata d'una alianza estratéxica pa desarrollar y promover el negociu fuera de la casa, "con productu de calidá en dos categoríes básiques, lleche y aceite, al traviés de dos marques cabezaleres, auntéticos iconos de l'alimentación española".
  
Pela so parte, el direutor xeneral de Central Llechera Asturiana, José Armando Tellado, manifestó que l'acuerdu constitúi "una prueba más" del compromisu de la so empresa cola canal 'horeca' y col desarrollu de marques cabezaleres. "Esta alianza permitirámos siguir creciendo y meyorando la satisfaición de los nuesos distribuidores y consumidores", apuntó.
 

Contador Estadistiques