El Ministeriu d'Industria, Turismu y Comerciu publicó nel BOE'l real decretu pol que se declara zona susceptibles de ser un efeutivu almacenamientu de dióxidu de carbonu, al área denominada 'Asturies Centru', nel nuesu país y parte de la plataforma continental costera.

El Conseyu de Ministros del pasáu 11 d'avientu aprobó'l Real Decretu sobre 'Asturies Centru', con un perímetru que llenda una superficie de 41.040 cuadrícules mineres. La zona de reserva a favor del Estáu tendrá una vixencia d'un añu dende güei. Esi plazu será prollongable por orde ministerial "si les circunstancies asina lo aconseyen", por mor de los trabayos realizaos, resultaos algamaos y futures posibilidaes nel área de reserva, según la redaición del decretu consultada por Europa Press.
 
Nel real decretu recoyíu nel Boletín Oficial del Estáu (BOE) falase de "Asturies Centru" como "zona de reserva provisional a favor del Estáu pa esploración de recursos de la estaya estructures soterrañes susceptibles de ser un efeutivu almacenamientu de dióxidu de carbonu".
 
La esploración d'esta zona de reserva realizarála Hunosa, d'acordies col programa xeneral d'esploración aprobáu. El Decretu, señala que se cumplieron "los trámites preceptivos y previos informes favorables" del Ministeriu d'Economía y Facienda d'Asturies, del Institutu Xeolóxicu y Mineru d'España, y d'Abogacía del Estáu.