El presidente d'Haití afirma que pue haber miles de muertos

El presidente haitianu, René Préval, consideró que'l terremotu de 7,3 graos que sacudió el so país pudo dexar miles de muertos, si bien almitió que tovía nun foi posible realizar una "evaluación" sobre la catástrofe, qu'afeutó sobre too a la capital, Puertu Príncipe.

"Tenemos que facer una evaluación", reconoció Préval, nes sos primeres declaraciones públiques realizaes al diariu 'Miami Herald', calificando la escena na capital de "inimaxinable". "El parlamentu cayó embaxo, la oficina de Facienda tamién, les escueles esbarrumbaron, los hospitales tamién", esplicó.

Según dixo, "hai munches escueles que tienen a munches persones muertes", y ente los atrapaos baxo'l Parlamentu alcuéntrase, con vida, el presidente del Senáu, Kely Bastien.
  
El presidente, que nun taba nel momentu del seísmu nel palaciu presidencial, que tamién quedó destruyíu, esplicó que percorrió dellos barrios de Puertu Príncipe y pudo ver l'algame de los daños. "Tolos hospitales tán llenos de xente, ye una catástrofe", llamentó.
  
Pela so parte, la primer dama, Elisabeth Préval, tamién faló de "catástrofe" y sorrayó que l'hospital xeneral esbarrumbó. "Necesitamos apoyu, necesitamos ayuda, necesitamos inxenieros", reclamó.