El Gobiernu amplía les ayudes al arreglu y alquiler de vivienda en 2,7 millones d'euros

La conseyera d'Alministraciones Públiques y Vocera del Gobiernu, Ana Rosa Migoya, informó güei en rueda prensa de que'l Conseyu de Gobiernu aprobó una ampliación nes partíes destinaes a la convocatoria pública d'ayudes pal arreglu y alquiler de vivienda, que s'amplíen en total en 2,7 millones.

Según l'Executivu rexonal, esa decisión s'adopta como respuesta al incrementu de les solicitudes d'ayuda al arreglu de vivienda y supón una inversión adicional de 1,5 millones d'euros. Con esti acuerdu la Conseyería de Bienestar Social y Vivienda destinó nel 2008, 8,5 millones d'euros n'ayudes pa favorecer la recuperación de viviendes n'Asturies.

Lo mesmo pasa nel casu de les solicitudes d'ayuda al alquiler, una partida que s'incrementa en 710.000 euros nel 2009 y en 547.519 euros nel 2010 (Total: 1.257 millones d'euros). D'esta manera, el dineru previstu pa financiar estes ayudes va superar los 2,5 millones d'euros nel 2009.

Per otru llau, tamién s'aprobó güei la cesión de baldre pol Ayuntamientu de Peñamellera Alta d'un inmueble de propiedá muncipal denomináu 'Escuela y Vivienda', n'Oceño, pa destinalu a viviendes sociales en réxime d'alquiler.

Se formaliza asina la cesión del inmueble que va acoyer l'antigua escuela pa tornar nuna vivienda de proteición oficial en réxime d'alquiler. L'inmueble cedíu cuenta con una superficie de suelu de 73 metros cuadraos, y una superficie construyida de 132 metros cuadraos, repartíos en 63 metros cuadraos la planta baxa y 59 metros cuadraos na primer planta.

Per otru llau, y en materia de Presidencia, Xusticia y Igualdá, el Gobiernu autorizó una sovención de 40.000 euros a l'Asociación Cultural Xaréu d'Ochobre pa la realización d'un intermcambiu cultural cola Comunidá Asturiana de Pinar del Río (Cuba).

EMPLEGU

Amás, aprobóse'l gastu de 23.731.565 euros destináu a sovencionar a les entidaes llocales (ayuntamientos y mancomunidaes) pa la contratación de trabayadores al traviés de los Planes Llocales d'Emplegu demientres el periodu 2009-2011.

Estes sovenciones van vese completaes dempués per otra llinia d'ayudes de la Conseyería d'Alministraciones Públiques pa la compra de materiales destinaos a les obres que son realizaes al traviés d'estos planes d'Emplegu Llocales, informó Migoya.

A lo último, por pidimientu de la conseyería d'Alministraciones Públiques, fueron autorizaos dos convenios de collaboración específicos col Institutu pa la Reestructuración de la Miniería del Carbón y Desarrollu Alternativu de les Comarques Mineres pa la execución de la Minería de proyeutos municipales financiaos con Fondos Mineros (Plan 2006-2012), con un presupuestu global de 1.749.960 euros. Afeuten a los conceyos de Morcín y Samartín del Rei Aurelio.

Tamién s'aprobó la concesión de dos sovenciones a los conceyos de Salas y Ribedeva por importe global de 370.000 euros.