Bloque por Asturies acusa al Conceyu de Navia d'usar la sovención de normalización llingüística pal Parque Históricu

|

El Bloque por Asturies acusó güei al Ayuntamientu de Navia d'usar la sovención pa la creación d'un Serviciu de Normalización Llingüística pa integrala nel Parque Históricu de Navia, en llugar de crear esti organismu pal espardimientu del asturianu.

Asina lo denunció el voceru del Bloque, Pablo Fernández, que, xunto col secretariu xeneral de la organización, Roberto Colunga, convocó una rueda de prensa pa criticiar la "situación de precariedá" na que s'alcuentren los diferentes servicios de normalización llingüística d'Asturies.

Fernández espresó la so "preocupación" pola "llaceriosa situación" d'estos servicios, y ente los problemes que los afeuten destacó la "modificación de la so finalidá". Como exemplu punxo dos casos. El primer d'ellos foi'l de Navia onde, según matizó, en llugar de crear el serviciu de normalización, la financiación d'ésti destinóse al Parque Históricu, que ye un departamentu "con un enfoque d'espardimientu de la cultura asturiana", en llugar d'un instrumentu d'espardimientu llingüísticu.

La mesma crítica fizo de la Casa de la Llingua de Covera, que ye "un depósitu filolóxicu y non un serviciu de normalización".

A xuiciu del bloque éstos dos casos tán provocaos pola política de xestión del Gobiernu asturianu nesti sen. Criticó nesta llinia la política de sovenciones que, según Fernández, "nun ye una ferramienta apropiada" pa la financiación de los servicios de normalización, y encamentó a la Conseyería de Cultura a buscar otros instrumentos. Esplicó qu'en munchos casos (como'l de Samartín del Rei Aurelio) el serviciu tuvo peslláu hasta que nun s'ingresó l'abonu de la sovención. N'otros, "el trabayador ta sometíu a una situación de precariedá", al nun saber si al añu siguiente va siguir contando cola ayuda.

A lo último calcó na necesidad de tener unos criterios claros y concretos nes bases de selección, pa que los procesos seyan realmente "oxetivos".

El Bloque pidió, basándose nel actual pautu de Gobiernu ente PSOE y la coalición de la que forma parte, xunto con IU y Verdes, que la Conseyería de Cultura igüe estos problemes.

Contador Estadistiques