La Llei del Cine catalán esixe que los DVD incluyan una versión nesta llingua

El Conseyeru de Cultura y Medios de Comunicación, Joan Manuel Treserras, informó güei en rueda prensa que la Llei del Cine Catalán qu'aprobó güei'l Gobiernu d'esta comunidá esixe que los DVD incluyan la versión catalana nel menú d'idiomes. 

Amás, pa protexer el cine européu, les películes europees con 15 o menos copies serán les úniques que tarán llibres d'incluyir el catalán nel doblaxe o sotitulación. Les americanes, por exemplu, con menos de 15 copies sí deberán distribuyir la metá de les copies en catalán. "La norma yá nun ye xeneral", indicó Tresserras.
Los gastos d'estos doblaxes o sotitulaciones añadíes correrán a cargu de les distribuidores, anque Tresserras recordó qu'hai mecanismos d'apoyu al sector a los que puen acoyese y que'l sector va hacia la dixilitalizacion, colo que'l preciu de les copies "variará".
  
Mostróse "a favor dafechu" de la opción de los Cines Verdi, especializaos en Versión Orixinal Sotitulada (VOS), de facer la doble sotitulación -dalgo avezao en países como Bélxica- porque "cada vez vase a mercaos más multillingües", y apostó por ver les llingües "como un arriquecimientu y non como una torga".
    
En cuanto a les 'majors', Tresserras asumió que "tol mundu exerció la presión que podía exercer en función de los sos intereses", pero apuntó que "pese a lo que puea paecer", el tratu con eses grandes distribuidores americanes ye "xentil enforma".
  
En consideranza colos miembros del sector "más quexones", güei mesmu modificóse l'artículu 8, como un "xestu" col envís de "abrir la puerta" pa qu'haya más acuerdos.
  
Según el conseyeru, esta llei completa los oxetivos de la Corporació Catalana de Mitjans Audiovisuals (CCMA) dao que ta fecha "pa cambiar l'estáu de les coses", nun sector que nun fixo "avances considerables en democracia", y nel que'l catalán tenía una presencia "simbólica".
 
Al parlament pela vía d'urxencia
  
A últimos del 2008 entamó a tramitase l'anteproyeutu d'esta llei qu'agora, tres el sí del Gobiernu, entamará la tramitación parlamentaria, que se fairá pela vía d'urxencia y que debería tar llista en xunu.
  
Demientres esti segundu procesu'l testu nun sufrirá munchos cambios, auguró Treserras, alegando que foi una llei "que vivió un procesu d'alderique públicu en dalgunes etapes".
  
Na ellaboración, participaron los axentes del sector faciendo alegaciones; "munches", incorporaes nel documentu, indicó'l conseyeru, polo qu'esperó'l "máximu apoyu" del mesmu y políticu. "Ye  una gran obra colectiva", acabó.