La Eurocámara bloquia la norma que permite ampliar la xornada llaboral hasta 65 hores selmanales

El Parlamentu Européu bloquió güei la norma que permite ampliar la xornada llaboral máxima de 65 hores selmanes que foi aprobada polos ministros de Trabayu de los 27 el pasáu mes de xunu col votu a la escontra d'España. Los eurodiputaos aprobaron por mayoría absoluta una serie d'enmiendes qu'exixen que nun plazu máximu de tres años se supriman toles esceiciones a la xornada llaboral de 48 hores selmanales.

La Eurocámara exixó amás que se considera tiempu de trabayu la totalidá del tiempu de guardia, incluyíu'l periodu inactivu. Esto cuestiona tamién l'acuerdu algamáu polos Ventisiete, según el cual el periodu inactivu de la guardia (por exemeplu, cuando un mélicu duerme nun hospital) nun debe considerase como tiempu de trabayu a menos que la llexislación nacional, un conveniu colectivu o un acuerdu ente mediadores, disponga lo contrario.

Les enmiendes fundamentales recibieron un apoyu mui superior a la mayoría absoluta de 393 votos que yera necesario pa que salieren alantre. La mayoría algamó más de 500 votos. Ello significa que, amás de socialistes y grupos d'Izquierda, apoyáronles munchos eurodiputaos del PP, incluyíos los españoles.

El votu de la Eurocámara abre agora un nuevu periodu de negociación de 90 díes (denomináu 'conciliación') ente'l Parlamentu y el Conseyu, al acabar el cual, si nun hai acuerdu, anúlase'l testu.