Los presos d'ETA enzárranse nes sos celdes

El coleutivu de presos d'ETA (EPPK) entamó "una primer fase" de la "protesta" qu'anunciare nos últimos díes con un enzarru nes sos celdes, según una nota unviada al diariu vascu Gara.

La información, recoyida por Europa Press, precisa que, tres una selmana dedicada a espardir la so iniciativa, EPPK entamó una primer fase de protestes con "chapeos" col envís d'exixir a los Gobiernos español y francés un cambiu de la política penitenciaria.

Les 742 persones que componen el coleutivu de presos entamaron ayeri la so protesta "negándose a salir de la so celda" y nun se comunicarán con naide demientres el tiempu que dure la iniciativa. El so oxetivu sería que nos Estaos español y francés "se reconoza'l so estatutos políticu y cesen les violaciones de derechos".
 
Nel testu unviáu al diariu, los presos exixen la puesta en llibertá darréu de los reclusos enfermos o de los que cumplieron la so condena "de manera íntegra o de los que s'alcuentren en periodu d'accesu a la llibertá condicional".
 
El pasáu llunes, Gara informó qu'EPPK entamaba "una dinámica de llucha como respuesta a les nueves vueltes de tuerca represives que se dieron nos últimos meses" y que, al so entender, pretenden "condicionar l'abertura d'un nuevu ciclu políticu n'Euskal Herria".
  
Nel comunicáu del colectivu de los presos tamién s'esplicaba que cinco persones "decidieren asitiase fuera de la disciplina" d'esti coleutivu. Los espulsaos son Iñaki Rekarte, Valetín Lasarte, Esteban Murillo, Jorge Urruñuela y Andoni Muñoz.