De la Vega apuesta por Zapatero como candidatu

La vicepresidenta primera del Gobiernu, María Teresa Fernández de la Vega, apostó esti llunes pol xefe del Executivu, José Luis Rodríguez Zapatero, como candidatu a la reelección. De la Vega mostróse convencida de que "col tiempu" los ciudadanos valorarán les midíes del Executivu contra la crisis.

"Yo pienso que tenemos el meyor presidente y tenemos el meyor candidatu", afirmó nuna entrevista en 'Los Desayunos de TVE'. De la Vega compartía asina la perceición del 'númberu dos' del PSOE, José Blanco, qu'aseguró que nun se plantega otru escenariu que nun sía un tercer mandatu de Zapatero. "Nun tenemos nenguna dulda porque somos conscientes de que tenemos el meyor cabezaleru, y vamos a apostar pol meyor cabezaleru que ye'l presidente Zapatero", recalcó.

Sicasí, nun quixo vaticinar ónde se ve a sí mesma nel futuru. "Nun faigo planes", señaló, pero añadió que, si tien salú, siguirá trabayando "al serviciu de los ciudadanos", dende "un proyeutu socialista".
  
La tamién vocera del Gobiernu evitó tamién comentar les encuestes qu'apunten a que si güei se celebraren elecciones ganaríales el PP por polo menos tres puntos y retrucó que, síen "meyores o peores", al Executivu lo que-y preocupa güei ye "superar la situación de crisis y crear emplegu" y que "la meyor encuesta sería la del crecimientu del emplegu o la desaceleración del paru".
  
Asina, opinó que "col tiempu" los ciudadanos conocerán "el resultáu de les midíes" del Gobiernu. "Dientro d'unos meses, dientro d'un añu, la situación será diferente, de xuru que va ser diferente, de xuru que va ser meyor", manifestó. Nesti planu, auguró, los ciudadanos apreciarán "que meyoraron nel so bienestar na so vida, nes sos economíes familiares y personales".
  
Per otru llau, De la Vega repitió'l so convencimientu de que'l Tribunal Constitucional emitirá "pronto" una sentencia que "avale" l'Estatutu de Cataluña que, al so xuiciu, ta "d'acorde" cola Constitución. Sobre esti puntu, recordó que l'Estatutu ta "aplicándose con normalidá democrática" y deseó que'l Constitucional "avale esa normalidá democrática".
 
Quita-y importancia al desalcuerdu
  
Amás, restó importancia al desacuerdu ente'l presidente de la Generalitat, José Montilla y l'ex vicepresidente del Gobiernu Alfonso Guerra, qu'opinó que los políticos catalanes deben de tar "na estratosfera" por aldericar tanto sobre una sentencia que tovía nun existe.
  
Pa De la Vega, "na aplicación práutica" nun hai problema nengún y, amás, "nuna democracia los alderiques siempre son bonos". Al so xuiciu, pue o non tase d'acordies "en dalgunos estremos", pero lo cierto nesti momentu ye que l'Estatutu ta en vixencia y ye una norma que "aportó una regulación meyor de la convivencia en Cataluña", igual que tolos nuevos Estatutos nes sos respectives comunidaes.
  
Na mesma llinia, apostó por facer "pedagoxía" pa evitar que la ciudadanía perciba "una alarma" cuando nun hai motivos pa ello. En concreto, tres volver a afear al PP que recurriere l'Estatutu, quixo declarar qu'España nun se rompió, sinón que "funciona como un país unitariu" y "con pluralidá".