El PAS esixe qu’en 2010 la RTPA cumpla cola toponimia y la llingua

El Secretariu d’Organización de la Executiva del Partíu Asturianista, José Antonio Fernández Alonso, pidió qu’e 2010 la RTPA cumpla cola toponimia oficial d’Asturies, del mesmu mou qu’una mayor presencia de la llingua nel Ente públicu. Tamién, al traviés d’una nota de prensa, quixeron espresar el malestar de la organización cola “probe presencia de músicos asturianos nes gales de Nuechebona y Nuechevieya”.

El PAS recuerda que na tresmisión de les campanaes dende Rusecu, capital del conceyu de Sobrescobiu, la TPA nun s'utilizó la toponimia oficial na so web, “demientres el Gobiernu d’Asturies ta en plena de supuesta promoción de la nuesa toponimia”, señalen.
 
Fernández Alonso tamién denuncia la curtia presencia del idioma na televisión y radio públiques, “una presencia llamentablemente, curtia y arrequexada a usos mui determinaos, en contra de lo que dispón l’Estatutu d’Autonomía y la Llei d’Usu del asturianu de 1998”.
 
No que cinca a les gales musicales, el PAS denuncia que mientres la gala actuaron dellos cantantes que teníen nula rellación con Asturies y cola so cultura, “escaeciéndose l’Ente públicu de que n’Asturies tamién tenemos cantantes, gaiteros, grupos y una música y cultura propia que no tien que ser eclipsada con cantantes de copla”.