Maeva señala la recuperación ecolóxica de la ría d'Aviles "a pesar de los problemes"

El Grupu d’Ornitoloxía Maeva informa de la recuperación ecolóxica de la ría d’Avilés, que “foi ganando en vida, al empar que menguaben unos problemes y medraben otros”. Asina, rescamplen l’aumentu d’especies, pero señalen los munchos problemes ambientales que tovía esisten, “que faen que les grandes posibilidaes de la ría queden namás en dalgo potencial”.

Ente lo positivo falen de la recolonización d’organismos pola progresiva llimpieza de les agües, que faen que la cadena ecolóxica vaya medrando y llegando nueves preses y depredadores. Rescamplen l’aumentu del númberu d’aves acuátiques invernantes a lo llargo d’avientu, yá que mientres en 2007 había 23 especies, n’avientu d’esti añu qu’acaba de finar hubo 44.
 
No negativo falen de la perdida d’hábitat, la destrucción de les marismes de Recastrón al construyir nuevos muelles, la desapaición de la mayor parte de la comunidá vexetal de la Ensenada de Llodero al agrandar la curva de Pachico y l’aumentu de la erosión de les dunes de Zelúan polos dragaos.
 
Maeva esclaria que nos próximos años la via xabaz de la ría d’Avilés dirá medrando pola calidá de les agües, motivada pol pieslle d’instalaciones industriales y la obligación llexislativa d’instalar depuradores, anque siguirán los problemes como la reducción del espaciu vital o los vertíos incontrolaos.