El Congresu aprueba la nueva llei del audiovisual

La Comisión Constitucional del Congresu de los Diputaos aprobó güei xueves la nueva Llei Xeneral de la Comunicación Audiovisual. Colos votos a favor de PSOE, CiU y Coalición Canaria, la norma, qu’afita un nuevu marcu pal sector audiovisual, va permitir la emisión d’una canal autonómica fuera de les llendes de la comunidá.

El testu tien agora que pasar el preste del Senáu y va permitir la emisión d’una televisión autonómica en territorios llendantes colos que comparta “afinidaes llingüístiques y culturales”. Sicasí, afita que tien qu’haber un conveniu ente les partes y qu’esista reciprocidá. Esti puntu foi pautáu por PSOE y CiU y respuende a la vieya reivindicación de que la televisión catalana puea vese nel País Valencianu.
 
Per otru llau, la llei quier acabar coles radios pirates. Poro, va crease l’Axencia Estatal de Radiocomunicaciones que va realizar en collaboración coles alministraciones autonómiques un mapa de les radios del Estáu, encargándose de pesllar aquelles que nun tengan llicencia .
 
La nueva llei, qu’establez que les televisiones podrán emitir 19 minutos de publicidá por hora, cuntó colos votos negativos de PNV y ERC-IU-ICV. Mientres que’l PP astúvose na votación.