La Conseyería de Mediu Ambiente unviará a la Fiscalía l'informe sobre les aves muertes na ría de Villaviciosa

La Conseyería de Mediu Ambiente, Ordenación del Territoriu y Infraestructures unviará nos próximos díes a la Fiscalía de Mediu Ambiente l'informe sobre les aves muertes na ría de Villaviciosa, unos fechos asocedíos el día 30 d'avientu na Reserva Parcial de Villaviciosa. L'oxetivu ye que la Fiscalía investigue les causes y trate d'esclariar los fechos.

Según informó la Conseyería nuna nota prensa, un miembru de la Guardería de Mediu Ambiente destináu a esti espaciu protexíu que foi'l qu'alcontró les aves muertes al llau del Centru d'Interpretación de la Ría de Villaviciosa, en Samartín del Mar. Toes elles presetaben furacos de bala producíos por un arma del calibre 22.

Les especies en concreto que s'atoparon fueron una garza real, dos 'garcilles bueyeres', una pega, un estornín un miruellu y un gurrión. La mayoría d'elles son especies protexíes.
  
Nel mesmu día en qu'asocedió'l casu, presentáronse denuncies nel Xulgáu correspondiente per parte del Seprona y del director de la Reserva. Dende Mediu Ambiente, califícase de "mui grave" por tratase d'aves protexíes que viven nun espaciu que ta declaráu Reserva Natural Parcial dende l'añu 1995. Fontes de la Conseyería confirmaron que s'andecharán tolos esfuerzos posibles pa que los fechos nun queden impunes y se descubra a los responsables d'esta "atrocidá".
  
La Conseyería de Mediu Ambiente desmintió amás que nun existan efectivos bastantes pa vixilar la Ría, "ya que si bien ye cierto que siempre sería deseable tener más personal, alcuéntrense trés persones de la guardería d'esta Conseyería dedicaes a los llabores de control y vilixancia na Reserva, xunto col Director de la mesma", esplicaron les mesmes fontes.