Asturies reivindícase en Facebook

Les redes sociales tán de moda y dientro d’elles los grupos. En Facebook, anguaño, podemos ver  xente que reivindica dende que nun haya crucifixos nes escueles, hasta los qu’odien los papa noeles nos balcones. Dende l’humor hasta la reivindicación, too cueye dientro de Facebook. Y anque la rede social tovía nun usa l’asturianu, hai un bon garapiellu de grupos que reivindican la llingua y la cultura del país.

Asina, cuasi 2.600 persones reivindiquen un Facebook n’asturianu, más de 1.300 piden la oficialidá de la llingua, cuasi 1.000 tán cola llabor de la Xunta pola Defensa de la Llingua y unes 620 son almiradores de la Pita de la Xunta.
 
Avérense a 4.000 les persones que reivindiquen que viaxen a Asturies y nun a Uviéu, en rellación al códigu del Aeropuertu d’Asturies (OVD), mientres que van pa mil les persones que nun quieren que’l nuesu país sía un cementeriu de residuos sólidos.
 
Tamién hai grupos de sofitu a l’Academia, a Radio Sele, a Softastur, a Camín de Cantares… Inclús más de 300 persones piden que Vicente Díaz preséntase a la preseleición d’Eurovisión organizada por TVE. Hasta hai xente qu’odia l’escanciador electrónicu y reivindica “la sidra echada como tien qu’echase”.
 
Asturies.com tamién ta presente en Facebook y dende fai díes yá usamos el nuestru perfil, averámonos a los 200 amigos, pero queremos munchos más.