Ecoloxistes refuguen la construcción de la incineradora por ser un alternativa "peligrosa y cara"

Coordinadora Ecoloxista d'Asturies mostró güei'l so refugu a la construcción d'una incineradora n'Asturies, al considerala como una alternativa "peligrosa" y "cara" pa los ciudadanos.

"Ye la que menos emplegu xenera, la que destrúi les materies primes presentes nos residuos, que presenta un desfavorable balance enerxéticu, precisa un vertederu pa escories y povises", esplicaron al traviés d'una nota prensa dende la Coordinadora, los que consideraron "estrañu" qu'hubiere sitiu pa colocar la incineradora en Xixón.
 
A xuiciu de los ecoloxistes existen yá diferentes vertederos y los residuos sólidos urbanos precisen d'unes polítiques "más actives" de reducción, reutilización y de reciclaxe.

Esplicaron que cada añu se lleven a los once vertederos controlaos, 4.170,975 tonelaes/añu, de los que 1.628.348 son residuos de térmiques (escories, povises, yesu) y el restu son otros residuos industriales, construcción, llodos de depuradores y residuos sólidos urbanos son 466.262 tonelaes/añu, "lo que representa que los residuos vertíos en vertederos controlaos al añu n'Asturies, sólo un 12% son residuos urbanos". Añadieron que, amás de Coxersa, hai otros xestores significativos de residuos "tan peligrosos como los urbanos".